مروحة السقف
على عكس
كل عفش البيت
مقلوبة.. مروحة السقف
وبتبص باحتقار
على كل شىء ثابت
علشان كده
دايمًا بحاول.. أهز حبل الغسيل
وأكسر.. كوباية الشاى
ولما يشتد النسيم اللى جاى
من تلت ريش ف السقف
باسيب ضلفة باب الأوضة
تترزع فى الحلق
قربان
يمكن يراضى المختلف
على عكس
كل شىء ملتزم فى الطريق
بتكون إشارة
الرجوع للخلف فيها ونس
على الأقل
بتكون صاحبت كام عمود كهربا
ومطب صناعى
بتعمل نفسك مش شايفه
مروحة السقف.. مش هاتسامحك
علشان وقت ما بتنام
بتقلد عفش البيت
وبترفض تحلم.
