مي كساب تطالب جمهورها بالدعاء لإبنتها

تعيش الفنانة الشابة مي كساب، حالة من الحزن، بعد أن اصيبت ابنتها فريدة، والتى تبلغ من العمر شهور، بكسر فى عضمة الترقوه.

وعبرت مي، عن حزنها الشديد بكلام مؤثر نشرته عبر حسابها الرسمي بموقع الصور الشهير "إنستجرام"، قائلة:"ما كنتش عاوزة أكتب أي حاجة ولا أتكلم، بس اتعودت إنكم جزء مني بافرغ اللي جوايا معاكم، وبافرح بكلامكم الحلو اللي بيديني كل الطاقه الإيجابية اللي بتخليني قادرة أكمل في الحياة".

وأضافت مي، قائلة: "امبارح كان يوم وحش قوي، أصعب من يوم وفاة أمي، أول مرة هاقول الكلام ده في حياتي، لما أمي ماتت فضلت تعبانة نفسيا جدا وحاسة أن أنا السبب، أنا اللي أخدتها واديتها الإشعاع، وفضلت عايشة كتير بالإحساس ده، بس الحمد لله ربنا كان حاضني جدا واداني إشارات كتير قوي تبرد قلبي، وانا الحمد لله جريت على الكعبة عشان أبرد قلبي وعملت عمره لامي وهديت خالص، وقلت إنا لله وإنا إليه راجعون، ده عمرها وانتهي لحد هنا".

وعن ما حدث لإصابة ابنتها قالت مي: "امبارح كنت شايله فريدة مشيت بيها بالظبط متر من الريسيبشن للجنينة، كنت عاوزه اقعدها في الشمس، راحت أيد الكرسي مفكوكة ووقعت على الأرض، عشت أسود يوم في حياتي، كنت حاسه كأني مجرمة مذنبة، مش قادرة أوصف عامل إزاي، عينيا ما بتنشفش من الدموع، عندها كسر في عضمة الترقوة يا قلب أمك، طب دي هاتستحمل إزاي، هانام إزاي الليل هايعدي علينا إزاي، بس ألف حمد وشكر لله، عدي الليل وربنا رحمته واسعه الحمد لله، قل لن يصيبنا الا ما كتب الله لنا، ربنا يحفظ أولادنا، الضنا غالي قوي، الله يرحمك يا أمي ربنا يقوي كل الأمهات والابهات علي تربيه ولادهم والحفاظ عليهم ربنا يقدرني ويحفظلي بنتي ويخفف عنها الالم بصتلي بصه امبارح بالدنيا كلها كأنها بتتكلم وبتقول لا يا ماما ما تعيطيش انا هابقي كويسه ربنا يحفظك يا نور عين ماما ربنا يرزق كل مشتاق #مي_كساب #عيد_الام #حبيبه_قلبي".