سابونى أذاكر تاريخ

أنا كل ما أجيب ف سيرتها

ماعرفش ليه وكإنّى..

بشيل على كتفى لحد ما أميل واعطش كتير

ولسانى اتربط

ساذج

وسابونى أذاكر تاريخ

ف كتاب الحساب

ومستنّى النّتيجة..

من كل الإجابات الغلط

أنا كل ما أجيب ف سيرتها

بحس بوجع

وكإنّه داخل ف قلبى ناب

ده مافيش صفحة ف كتاب

إلا وقالت لى:

حاسب..

الليل جراد سهران

والناس غيطان خضرا 

التاريخ مليان حُفر

والحلم دنيا بتتعصر أوطان

والدم نازل م الورق

أنا كل ما أجيب ف سيرتها

مهما كان وسع البراح..

بحس روحى بتتخنق