بالفيديو.. عبد الغني لـ"أبو تريكة": "الدولة مش بتتلكِّك.. ومينفعش تقف ضد الجيش"
أعرب مجدي عبد الغني، عضو مجلس إدارة اتحاد الكرة المصري، عن أسفه لدخول عدد من الرياضيين، ومنهم محمد أبو تريكة نجم الأهلي ومنتخب مصر السابق، ونادر السيد حارس الزمالك ومنتخب مصر السابق، في المعترك السياسي بشكل خاطئ.
وأضاف "عبد الغني": كان يجب يعرفوا أن هذا الوطن له واجب عليهم، قائلا: "مكنش ينفع ينحازوا لطائفة ضد أخرى، ومينفعش يقفوا ضد الجيش المصري، ويجب أن يكونا على الحياد".
وقال "عبد الغني": "للأسف الشديد معرفش من جرّ رجلهم، ومين اللي غواهم، ومين اللي أدخلهم هذا المستنقع؟!"، في إشارة إلى أبو تريكة ونادر السيد.
وتابع: "أنا سمعت إن أبو تريكة راح اعتصام رابعة، ولكني مشفتش، وأنا لا أُشكِّك في أخلاقه إطلاقا، ومش ممكن يكون في دخان من غير نار، ومش ممكن تكون الدولة بتتلكك لنجم بشعبية كبيرة بهذا الشكل، مش متخيل إن ممكن تكون الدولة حطَّاه في دماغها.. وكلنا مصدومين مما حدث معه".
واختتم- خلال تصريحاته لبرنامج العاشرة مساءً مع الإعلامي وائل الإبراشي-: "لازم المسئولين يطلعوا يقولولنا ليه عملوله كده، وليه اتحفظوا على أمواله، وحطوه ضمن قائمة الإرهابيين، ومين اللى رفع القضية، وهل هو متورط فعلا ولا إيه، علشان الناس تفهم إيه اللى حصل".
