بعد هجومه عليه.. حسام حبيب يرد على والده: «ليا الشرف إني تربية ست»

علّق الفنان حسام حبيب، على تصريحات والده حسين حبيب، والتي وصفه فيها بأنه "تربية ست".

وكتب "حبيب"، عبر خاصية ستوري "إنستجرام": "أنا ليا الشرف إني تربية ست لأنها بـ100 راجل، وتربية الست دي هي اللي هتخليني مردش عليك، حسبي الله ونعم الوكيل".

وكان حسين حبيب هاجم ابنه الفنان حسام حبيب، متهما إياه بتحطيم حياة زوجته الفنانة شيرين عبدالوهاب بسبب "مخالفته لشرع الله"، على حد وصفه، وبعدما أكد أنه لا يوجد تواصل معه منذ 14 عاما.

وقال حسين حبيب، عبر حسابه الشخصي على فيسبوك: "قولوا الحق ولو على أنفسكم، هو ينفع أخالف شرع ربنا بحجة إنى أحمي أولادي البنات؟ ليها الثلثين والأهل ليهم الثلث بعد عمر طويل، وده يخلي الأهل راضيين ويراعوا البنات بعد عمر طويل، ودي صلة رحم، وغير كده يزرع العداوة بين الأهل". 

ووجه رسالة لابنه قائلا: "إنت كده مش بتحافظ على مال زوجتك، أنت تخالف شرع ربنا والنتيجة انهم فضحوها وقضوا على مستقبلها، وزرعت العداوة بينهم وحطمت زوجتك بجهلك بشرع ربنا، ولو كنت بتسأل أبوك كان أرشدك للحق والكل طلع كسبان يا قاطع صلة الرحم وعاصي أبوك، ضيعت نفسك وضيعت البنت معاك".

وتابع: "هو ينفع أخوها بقاله أكتر من 20 سنة بيراعي أخته وهي مصدر رزقه، آجي أقفل عليه الحنفية ويقعد أربع سنين من غير شغل وراجع تاني تقفل عليه الحنفية هو وأمه وأخته وعايزه يسيبك، يا ناوي على قوتي يا ناوي على موتي، الزوج يتعوض الأم والأخ ما يتعوضوش، كلمة حق لوجه الله، والدين النصيحة".

وأضاف والد حسام حبيب في منشور آخر: "إنت بتقول لما رجعت ليها العربية، واحد بيشتغل معاها أخد العربية اللي بخمسة مليون وقالها هبقي أديكي بيها شغل، وواحد محاسب تعرفه قريب شكالها حاله أعطت له 100 ألف دولار وخلع، وإنها بتكتب شيكات للناس على بياض، إنت كده بتدي مبرر لأهلها يحجروا عليها وبتطلعها إنها سفيهة وعبيطة، وأنا من معرفتي بيها أنها واعية وناصحة، بتيجي تكحلها تعميها، اسأل أبوك يقولك تقول إيه".