لأول مرة منذ 17 عامًا.. سماح أنور تقرر شرب المياه (فيديو)
قررت الفنانة سماح أنور تناول "المياه" بعد انقطاع عن شربها لمدة 17 عامًا، وذلك بعد إلحاح عليها من الإعلامية إنجي علي، والتي كانت ظهرت معها في برنامجها "أسرار النجوم"، الخميس الماضي.
وعن سؤالها كيف كانت تعيش دون مياه؟، قالت سماح ببرنامج "أسرار النجوم" على "نجوم إف إم": "عايشة من غير مياه حاجة، وعايشة من غير سوايل حاجة تانية، والناس لخبط الموضوع معاها.. اللي مبيشربش مياه، بيشرب سوايل".
وأضافت: "يا جماعة عشان خاطر إنجي علي، أنا فعلًا بقالي 17 سنة مشربتش مياه، وجابولي مياه، ولأول مرة هشرب مياه عشان خاطرها".
وتابعت: "المياه كويسة، بس كتر المياه مش كويس، وأمريكا عاملة بيزنس اشربوا مياه كتير، واللي بيشرب مياه كتير بيجيله بلاوي في القلب والكلى، وإحنا عبارة عن إزارة مياه كبيرة، وجلدنا بيشرب مياه".
سماح أنور: جسمي بيضايق من شرب المياه
يذكر أن الفنانة سماح أنور صرحت في وقت سابق بأنها امتنعت عن شرب المياه منذ 17 عامًا، في تصريحات تليفزيونية، حيث قالت: "لازم المياه ميبقاش لها طعم ولا ريحة، دي مواصفات المياه اللي تتشرب وتنفع، المياه كلها ليها طعم وريحة، دي مبشربهاش، لما باخد شوية منها جسمي بيدايق علطول، بلاقي بطني وجعتني، وأنا لما ألاقي جسمي ادايق، بعرف أنا أخدت إيه دلوقتي، عشان في حاجات مينفعش معايا وخلاص، أنا لازم أعرفها، عشان أنا اللي بدايق، وأنا اللي بتعب".
وأضافت: "مش لازم نشرب المياه في بوقنا، ممكن ناكل المياه، أنا باخد المياه كتير من فواكه وخضروات، لإن هي دي المياه اللي محتاجها الجسم، لو وقفتنا في الهوا، الجسم بيشرب الرطوبة اللي في الهوا، ده حقيقي، كل مسامنا بتشرب طول الوقت، البيزنس الأمريكاني بيقولك اشرب مياه طول الوقت، وكل اللي شرب مياه طول الوقت تعبوا، لإن ده مش طبيعي، الطبيعي أن جسمي عايز حاجة هديهاله، لكن ما أجبرش جسمي على حاجة هيرقدني على طول، أو على المدى الطويل".
واستكملت: "المياه المعدنية لها طعم ولون وشوائب، أنا لما بشرب مياه بتعب، أشرب مياه مغلية أو فيها عصير أو قهوة، أنا كده بشرب مياه، فيه دكاترة هيختلفوا معايا وأنا موافقة عليهم أكتر من كلامي، لإن أنا بتكلم عن النظام بتاعي أنا بس، أنا مش متخصصة، مش بقول متشربوش مياه، أبقى مجنونة، أنا بقالي 17 سنة مشربتش مياه خالص".
آخر أعمالها
مسلسل "الليلة واللي فيها" مكون من 6 حلقات وبطولة زينة، محمد شاهين، سماح أنور، علاء مرسي، آلاء سنان، وعدد من الفنانين الشباب، تأليف محمد رجاء، وإخراج هاني خليفة.
