محمد المعتصم يكتب: يوميات رمضان.. نيللي كريم وحلا شيحة وأرملة صاحب الفضل

يفترض أن يتم تكريم لجان القراءة التى أجازت أعمال رمضان الدرامية لهذا العام. لأول مرة نشعر بالحيرة من كم الأعمال الجيدة التى تعرض في موسم واحد، رغم المشاكل التى تعرض لها بفعل الاجراءات الاحترازية.

فرصة تانية.. زياد قابل ملك، اللي هي مفروض فاقدة الذاكرة فطبيعي إنها تتعامل على انها ما تعرفوش، لكن الشهادة لله كان ناقص تديله جوز قلام.
فرصة تانية.. أيتن عامر حاولت الانتحار في بيت أحمد مجدي واتنقلت لنفس البيوتي سنتر اللي دخلت فيه ياسمين صبري وطلعها زي القمر
فرصة تانية.. دياب ممثل شرير بالفطرة
فرصة تانية.. ياسمين عبد العزيز بتفكر في كريم فهمي
فرصة تانية.. غريب أن نتحدث عن غياب الكوميديا في رمضان وبيننا إيمان السيد، دي قنبلة ضحك يا جدعان

البرنس.. محمد رمضان محتاج يشتغل مع محمد سامي مسلسل كمان علشان يرجع لمكانه
البرنس.. نور مش لاقية شغل وكانت مخنوقة لأنها مش عايزة تتقل على رمضان.. ورمضان زعل منها وقالها ده خير أمها، واخواته اتفقوا يقتلوه ولما اخته الصغيرة اعترض هددوها يقتلوها معاه
البرنس.. محمد رمضان ضرب رحاب الجمل قلمين وهبدها شلوت
البرنس.. روجينا بتعيد اكتشاف نفسها من جديد في دور أرملة صاحب الفضل
البرنس.. فيه مباراة تمثيل على جنب بين روجينا وأحمد زاهر، المباراة دي لآخر رمضان هتاخد نصيب الأسد من الكوميكس
البرنس.. دور الشبح اللي عاملة أحمد زاهر يمكن اعتباره الجزء التاني من دور الشرف اللي عمله في مسلسل رحيم من سنتين

فلانتينو.. حلقة النهاردة كانت دلال عبد العزيز قالت لأولياء الأمور إنها عارفة الي بيحصل على جروبات الماميز

الاختيار.. محمد إمام ظهر ضيف شرف للقيام بدور النقيب فتحي ضابط الصاعقة الفدائي خفيف الظل، اللي ضحي بحياته خلال الهجوم قبل أن يقول لمنسي جملته العظيمه: قول لأمي ابنك مات راجل"
الاختيار.. منعا للمزايدات وانكار متعهدي الدفاع عن الاخوان انتهت حلقة اليوم باعتراف هشام عشماوي في التحقيقات بمحاولة اغتيال وزير الداخلية
الاختيار.. جزء من أهمية العمل الدرامي إنه يشرح ببساطة سر استمرار الإرهاب ضد مصر.. الحلقة الخامسة حملت جزء من الإجابة بالكلام عن اكتشافات الغاز في البحر المتوسط

100 وش.. الجمهور اكتشف إن نيلي كريم بتعرف تعمل حاجات في التمثيل غير النكد
100 وش.. أسر ياسين دمه خفيف، ولايق ع الكوميديا

الفتوة.. إنعام سالوسة ممثلة عظيمة

كريزي تاكسي.. برنامج دمه خفيف وفيه شغل حلو

حتى الان.. الأسوأ لطبيب التجميل الخاص بحلا شيحة، والأفضل بلا منازع لطبيب نادية الجندي.. برضه الخبرة بتنفع