محمد المعتصم يكتب: يوميات رمضان.. ياسمين عبد العزيز وياسمين صبري وعمرو عبدالجليل.. وكفي

• النهاية .. بعد نجاح سهر الصايغ في إقناع عمرو عبد الجليل بصناعة روبوت يوسف الشريف.. في اعتقادي
إنك لو مسكت أي موبايل لأي بنت ستجد آخر عملية بحث: "طريقة عمل روبوت في البيت"
• النهاية.. عمرو عبد الجليل في منطقة تانية
• النهاية.. المحل الذي يبيع فيه عمرو عبد الجليل قطع غيار الذكاء الاصطناعي مقفول برزه.. أقسم بالله لو "كرم غباوة" لكان على الأقل جاب روبوت من اللي جوه مسكة شومة ووقفه بواب
• النهاية.. السؤال الذي لم يجب عليه المسلسل حتى الآن: بعد 100 سنة.. دولاب البطولات بتاع الزمالك هتدخله بطولات جديدة
• النهاية.. أحمد وفيق مستعجل على نهاية الكوكب
• فرصة تانية.. لو رضوى الشربيني شافت أيتن عامر هتجري وراها بتوكة الحزام
• فرصة تانية.. فيه فرق بين فقدان الذاكرة والتخلف العقلي
• فرصة تانية.. فيه مباراة تمثيل بتحصل في مشاهد محمد أبو داوود وأيتن عامر، وأحيانا محمود البزاوي.. والأخير تشعر في بعض المشاهد إنه مش في الفورمة.. أو مش عايز يعلى على اللي قدامه
• فرصة تانية.. ملك رجعت الشغل واتقالها 20 حمدلله بالسلامة ومستر سامح رزعها ألف حمد لله ع السلامة
• فرصة تانية.. في أول الحلقة ملك كانت فاقدة الذاكرة في آخرها صاحبتها بتقولها إنتي رجعتي شريرة
• فرصة تانية.. دعاء الشباب في رمضان: "اللهم ارزقنا بزوجه زي أيتن عامر في المسلسل"
• خيانة عهد.. جومانة مراد رجعت للفن بمسلسل و3 أخبار يوميا في المواقع
• رجالة البيت.. ما بيضحكش والمصحف
• ليالينا 80.. خالد الصاوي مدهش
• ليالينا 80.. يلخص حياة جيل شهد اغتيال السادات وبقايا "اللي ما اغتناش في عهدي مش هيغتني".. وشاهد التفسخ الاجتماعي مع العائدين من الخليج.. باختصار هو نوستالجيا الوجع
• ليالينا 80 ..غادة عادل هي ياسمين صبري المسلسل
• ونحب تاني ليه.. عمرو محمود ياسين قدم نفسه كمؤلف.. بدون كلكعة أو ادعاء بيقدم شخصيات من لحم ودم
• ونحب تاني ليه.. ياسمين عبد العزيز مدهشة لو استمرت على هذا الأداء ده هتكون نجمة رمضان بلا منافس
• الملاحظ في رمضان أن هناك ممثلات اتطلقت "ونورت" وممثلات اتجوزت واتطفت.. وده يؤكد إن الرجالة أقدام
• الأفيش ما بيعملش نجوم
• حلو بس.. برنامج أطفال أتمني إن يأخذ فرصته ويستمر بعد رمضان.. استمرار هذه النوعية من البرامج مهم جدا
• بكار أحلى حاجة على شاشة النهار
• 100 وش.. آسر ياسين اللي قطع قلوب الناس امبارح في مسلسل الاختيار النهارده خد اللاب توب بالعافية من علا رشدي في 100 وش علشان يبيعه ويكمل الفلوس اللي طلبتها منها سكر
• 100 وش.. نيلي كريم بتقدم شكل جديد الناس ما اتعودتش عليه معاها
• فلانتينو.. إمبارح سمير صبري جاله مكالمة على الهوا من طليقته وقفل المكالمة وقال إنه مش متجوز.. النهاردة اتجوز.. وعادل إمام حضر الفرح وكدب على مراته وقالها إنه رايح لأخته
• فلانتينو.. البنك رفض يدي عادل إمام قرض يصلح بيه المدرسة بسبب وجود 120 قضية وصل أمانة
• فلانتينو.. دلال عبد العزيز بتفكرني بـ3 مديرات مدارس أعرفهم.. نفس الاداء
• فلانتينو.. حمدي الميرغني تحس إنه خايف يمثل قدام عادل إمام
• الاختيار.. مشهد هم إزاي دخلوك هنا الذي جمع أمير كرارة (الصاعقة)، وإياد نصار (المظلات)، يؤكد اهتمام صناع العمل بالتفاصيل الصغيرة؛ فالصاعقة والمظلات زي الأهلي والزمالك وبينهما منافسة مستمرة على تنفيذ أصعب المهمات
• الاختيار.. من مصلحة أحمد العوض ألا يخرج من منزله.. لو حد شافه يا هياكله علقة يا هيتسلم للأمن
• الاختيار.. أفهم أن يهاجمه الاخوان وبقية التنظيمات والجماعات.. لكن أن يغضب منه مجموعة المؤلفة جيوبهم فالموضوع بقى مفضوح قوي
• الاختيار.. محمود حافظ شبه الصعايدة اللي أنا منهم ودي من المرات القليلة اللي أشوف ده
• الاختيار.. الشيء الايجابي في الكام مشهد اللي قدمهم آسر ياسين إنه أكد لصناع العمل أن هناك بطولات أخرى تستحق أن ينتج لها أعمال مشابهة.