راندا البحيرى تدعم رامى جمال برسالة مؤثرة

وجهت الفنانة الشابة راندا البحيري، الدعم للمطرب رامي جمال، بعد إعلانه لأول مرة، عن إصابته بمرض البهاق الجلدي، ومعاناته مع المرض منذ أكثر من عام، وحديثه عن تفكيره في الاعتزال في الوقت الراهن.

ونشرت "راندا" صورة لـ"رامي"، عبر حسابها الشخصي على موقع التواصل الاجتماعي "إنستجرام"، معلقة عليها: "الحمد لله علي كل شىء.. أنا بحبك أوي يا رامي وأنت أكيد عارف ده. ربنا يقدرك على اللي هتشوفه أكيد من المجتمع.. أنا عن نفسي بنصحك... تولع الناس. وخليك مع القريبين. وانجح. واشتغل أكتر من الأول كمان. بحبك جدا".

جاء ذلك بعد كشفه عن مرضه على موقعي التواصل الاجتماعي "إنستجرام" و"تويتر"، وقال: "الحمد لله الذى أحبنى فابتلانى وأقدرنى على الصبر.. من فترة ظهرت بقع بيضا فى جسمى وبالكشف عرفت إنه مرض البهاق، وجربت أنواع علاج كتير ودكاترة كتير ومفيش فايدة، ورضيت وسلمت أمرى لله عشان عرفت إن الزعل بيزوده وكفاية شغلانتى وصعوبتها والقلق الدائم من المستقبل، وفعلا بقى بيزيد لدرجة لفتت نظر ناس كتير، اللى بقى يقوللى هتتعامل إزاى وأنت فنان واللى يخاف يسلم عليا واللى يسألنى هو ده معدى، وأنا بقالى سنة فعلا لو عندى حفلة أو تصوير بتعب على ما أشوف طريقة أخفيه بيها، لدرجة خلت ناس تقولى شوف بيزنس تانى اعمله عشان الناس مش هتقبلك كده، وفكرت فى كلامهم بصراحة، لقيت إن عندى حلين يا فعلا شكرا لحد كده على الشغلانة دى رغم حبى ليها وعدم معرفتى بغيرها، يا إما مش هداريه تانى وتقبلونى بيه وترحموا كل اللى ربنا ابتلاهم بيه من نظرة أن شكله غريب، والحمد لله على نعمة الأهل لإنهم الوحيدين اللى بيقبلوا الواحد زى ما هو".