ابنه وجه إليه رسالة مؤثرة: مبروك يا إبراهيم أصلان التتويج
وجه شادي أصلان نجل الكاتب الراحل إبراهيم أصلان رسالة لوالده، وذلك بمناسبة فوز نادي الزمالك بدرع الدوري المصري لهذا العام للمرة الثانية على التوالي.
ومن المعروف أن إبراهيم أصلان كان مشجعا لنادي الزمالك، وله معه الكثير من الحكايات، وقال شادي أصلان في رسالته لوالده: "شوفت يا عم مش أنا رحت الاستاد وحضرت تسليم درع الدروي في الملعب، تخيل إن دي أول مرة من 10 سنين بالظبط اروح الاستاد".
وأضاف أصلان: "بس لو كنت هنا غالبا كنت هتفرج معاك على التتويج في البيت، ما أنا عارف إنك مالكش أوي في حكاية الاستاد دي، وعارف إنك لما كنت بتاخدني ونروح ماتش للزمالك إنك كنت بتعمل كده علشان تبسطني إنما لو عليك تحب تتفرج في البيت، علشان لما الزمالك يجيب جون تعرف تقوم وتقول اللهم صلي على النبي وتفرد كفوف إيدك وتصقف بيهم بصوت عالي".
وأكمل: "يا أخي تصدق إنه على مدار سنين عمري ورغم أني قابلت وصاحبت زملكاوية كتير وجُمال، بس كنت دايما أنت الزملكاوي الأقرب لقلبي، ومش بمنطق إنك أبويا وكده، لأ بمنطق إني كنت شايفك نموذج زملكاوي أحب إن كل الزملكاوية يبقوا شبهه".
وواصل: "عموما يعني تنظيم دخول الناس الاستاد مكانش أحسن حاجة، وكمان محدش كان مركز مع الماتش علشان كنا بنغني وفرحانين طول التسعين دقيقة، فمفيش حاجة كبيرة يعني فاتتك".
واختتم: "أنا بس قلت أمسي عليك وأطمنك أننا خدنا الدوري والدرع مكمل معانا السنة دي كمان في 100 عقبة وكله تحت السيطرة، مبروك الدوري يا عم إبراهيم.. وتصبح على خير".
