روبى: «خالاتى قاطعونى بسبب الفن وكان نفسى أتجوز وأقعد فى البيت»

حلّت الفنانة روبي ضيفة على برنامج "معكم منى الشاذلي"، الذي تقدمه الإعلامية منى الشاذلي، على قناة "cbc"، لتتحدث عن بداياتها في المجال والصعوبات التي واجهتها، كما تحدثت عن حياتها الشخصية مع أسرتها.

- ملخص تصريحات روبي في معكم منى الشاذلي

في البداية  قالت روبي إن جدها لوالدتها صعيدي، تخلى عن أخذ الثأر الخاص بالعائلة وعمل موظفا في وزارة الري، وكان يتمنى إنجاب ولد لكن رزقه الله بـ7 بنات، مضيفة "جدي صعيدي وكان عنده تار ما أخدوش.. كان موظف في وزارة الري، وكان حابب يجيب ولد لكن ربنا إداله 7 بنات لدرجة جدتي ماتت بسكر الحمل من كتر ما هو مصر على الخلفة ورا بعض عشان يجيب ولد.. بس السبع بنات دول كانوا أجدع من 100 راجل وأنا اتعلمت منهم الاعتماد على النفس".

 - أزمة عائلية بسبب دخولي عالم الفن

أضافت روبي أن خالاتها قاطعوها جميعا حينما عملت في المجال الفني وبدأت تقديم الكليبات، قائلة: "في بدايات عملي حصلت لي أزمة بسبب ردود فعل الناس وقرايبي.. لدرجة إن خالاتي السبعة قاطعوني وقاطعوا ماما، بس بعد كده وقفت أنا مع نفسي وقفة وفهمت اللي بيحصل وقلت هعيد صياغة الموضوع تماما، أنا مش ملخصة في غنوة ولا رقصة وقعدت كتير ثم عملت سجن النسا".

- متمردة منذ الطفولة 

وأوضحت روبي أنها كانت متمردة للغاية في طفولتها، وحينما توفي والدها منعت والدتها من الزواج، وهو ما تندم عليه الآن وتعتبره أنانية وظلما ارتكبته في حقها، قائلة: "أنا كنت متمردة جدا يعني مثلا بابا مات وماما عندها 34 سنة.. بعدها كان بيجيلها عرسان فأنا اتخانق واتجنن وهي تقول بنتي هتضيع مني وتخاف عليا فرفضت الجواز بسببي، لكن أنا دلوقت بضرب نفسي بالجزمة إن أنا مخلتهاش ترتبط لأن أنا كده ظلمتها وده كان أنانية مني".

- "محدش في البيت بيناديني روبي"

في نفس السياق، أشارت إلى أن "روبي" اسم فني بحت، ولا تتعامل أسرتها معها به، بل الكل في المنزل يخاطبها بـ"رانيا"، منذ أن دخلت المجال إبان فترة الثانوية العامة، وتحديدا في السنة الثانية، موضحة أنها لم تكن تسعى للشهرة ولم تتخيلها أبدًا. 

 وأضافت "وأنا في تانية ثانوي دخلت المجال كموديل إعلانات عشان أجيب فلوس آخد بيها دروس أو اشتري لبس وغيره، لكن عمر ما كان في بالي أبدا إني اشتهر.. داخلاه بهدف مادي بحت لكن فجأة لقيت نفسي اشتهرت.. طموحي أصلا في البداية وقبل أي حاجة وأنا صغيرة إني اشتغل موظفة واتجوز واقعد في البيت".

- "بنتي هي اللي بتربيني"

وبسؤالها عن ابنتها "طيبة"، قالت روبي إن ابنتها غيّرت من طباعها وتصرفاتها، وجعلتها مسئولة بشكل أكبر، موضحة أنها صلّت استخارة لأول مرة في حياتها لكي تختار اسم ابنتها، قائلة: "بنتي هي اللي بتربيني مش أنا اللي بربيها.. عندها 7 سنين بس تربية الأطفال صعبة جدا.. طيبة ده الاسم اللي أنا اختارته ليها.. وكان أول مرة في حياتي أعمل استخارة كان في الاسم ده، لأن في الأول كنت عاوزه أسميها (تحية) لكن الناس اتريقت عليا، فاستقريت على ده".

تابعت: "بنتي علمتني إن أنا أبقي مسئولة أكتر.. وإن أنا أصون لساني لأن أنا كنت بشتم، يعني مثلا بكلم صاحبتي في التليفون وواخدة راحتي فأشتم، لكن دلوقت لا علمتني الأدب".