طارق الجنايني يكشف تفاصيل إصابة والدته بكورونا
روى المنتج الكبير طارق الجنايني، تفاصيل إصابة والدته بفيروس كورونا المستجد وقراره علاجها في البيت لأن حالتها لا تستدعي الذهاب إلى المستشفى.
وكتب الجنايني، عبر حسابه الخاص على موقع التواصل الاجتماعي "فيسبوك": "كورونا مش عيب ولا حرام، أنا تقريبا عمري ما كتبت عن أي مرة توفى أو تعب شخص من عيلتي لأني بشوف إن دي حاجات شخصية ومحبش أشارك الناس بيها، إنما المرة دي حاسس إني محتاج أكتب التجربة دي لأنها ممكن تفيد غيري".
وأضاف: "أمي بقالها تقريبا 3 شهور مش بتنزل من البيت خالص وعاملها كل الاحتياطات اللي تمنع اختلاطها بأي حد غير مقيم معاها في البيت، المهم من 12 يوم عزمت 2 صديقاتها على الفطار، علما بأن صديقاتها برضو كانوا إلى حد كبير معزولين عن الناس بعد الفطار بيومين ابتدت أعراض كورونا تظهر على الصديقة الأولى، بعدها بيومين على الصديقة الثانية بأعراض أخف شوية، طبيعي تترعبنا، مع إن الأعراض عند والدتي لم تتعد التهاب الحلق وكحة ودوخة خفيفة".
واستكمل: "عملنا لأمي التحليل الأول، وطلعت النتيجة إيجابية لڤيروس كورونا اللعين، للعلم والدتي في منتصف السبعينات ومن 3 سنين عدينا بسرطان وما تلاه من علاج كيماوي وخلافه، يعني المناعة عندها مش في أحسن حالة بعد قراية كتير جدا وتواصل مع 3 أطباء أجلاء، قررت عدم نقلها لمستشفى (في حالات معينة هي اللي فعلًا محتاجة سراير المستشفيات)، بالإضافة إلى عدم بداية أي دواء من التقال".
واستكمل: "اعتمدنا على الآتي فقط":
- قرصين أسبرين 100 بعد الغداء
- قرص ڤيتامين سي 1000 مج مرتين في اليوم
- قرص ڤيتامين D مرة في اليوم
- قرص zinc 50 مج
- قرص ڤيتامين E
- قرص omega 3
- وفي حالة أي اضطرابات في المعدة، قرص nexium قبل الإفطار
- وعند الحاجة، قرص بانادول إكسترا كل 6 ساعات
- سوائل دافية (ينسون.. قرفه.. جنزبيل)
- غرغرة مياه وملح واستنشاق مرتين في اليوم، بالإضافة لصدقات كتير، لأني مقتنع تمامًا إن الصدقات ترد البلاء.
وأنهى حديثه قائلا: "الحمدلله الموضوع ماشي تمام، والأمور فضلت مستقرة لغاية ما عملنا تحليل تاني بعد 11 يوم من العدوى، والحمدلله النتيجة طلعت سلبية، بس لأن مش دايما النتايج بتكون مظبوطة وهي لسه عندها أعراض بسيطة، فإن شاء الله هنعمل تحليل أخير بعد اكتمال 14 يوم من العدوى، وإن شاء الله النتيجة هتكون سلبية، أتمنى التجربة دي تفيد أي حد هيقراها والناس تاخد حذرها أكتر لأن توقعي اللي أتمنى أكون غلط فيه، إن البلد دي هتعدي بأصعب أسبوعين عدوا عليها من زمان أوي، فأتمنى إن على الأقل الناس تكون واضحة وصريحة مع بعض، ومحدش يخاف ولا يخبي لأن كورونا مش عيب ولا حرام".
