حبسها 15 يومًا.. عروس الإسماعيلية تكشف التفاصيل الكاملة لاعتداء زوجها عليها
كشفت مها عروس الإسماعيلية عن تفاصيل تعدي زوجها عليها بالضرب، وحبسها في شقة شقيق زوجها لمدة 15 يومًا.
تفاصيل اعتداء زوجها عليها
وقالت مها خلال لقائها في برنامج "تفاصيل"، مع الإعلامية نهال طايل، والمذاع عبر فضائية "صدى البلد2": "أنا اتبهدلت واتهنت واتفضحت وشوفت أيام وحشة ما اتمناش لأي بنت تشوفها".
وأضافت: "كنت بقوله كتير وأقوله أنا عايزة أعيش سيبني أكمل، بس هو كان مصعب عليا خالص وحبسني في شقة أخوه 15 يوم وضرب وإهانة وشتيمة وتعبت".
وتابعت: "قلتله حابسني ليه قالي علشان الدور يكون قريب وترمي نفسك منه، فقلتله إنت راميني هنا علشان الانتحار طيب ما تسيبني أروح بيت أهلي البيت اللي إنت جبتني منه"، مؤكدة أنه اعتدى عليها بالضرب في عينيها وتسبب في ورم وجهها.
وأظهرت كاميرا البرنامج كم الاعتداء على جسدها، والتي علقت عليها المذيعة بأنها لم تكن تتخيل أن ترى مثل هذا الشكل.
وعن عائلة زوجها قالت: "كلهم جاحدين مفيش في قلبهم ذرة رحمة ولا شفقة مع إن معاملتي ليهم لم تكن وحشة، وكان الخلاف بيني وبين زوجي على أتفه الأسباب، وآخرها كان نقاش عادي بيني وبينه بيقولي إنتي متأخرة في الجواز قلتله أنا جالي ناس كتير فجأة بونيات نزلت على وشي".
كما علقت على موافقتها على الاستمرار معه بعد الاعتداء عليها بالضرب في الشارع يوم زفافها قائلة: "أنا قلت يمكن ينصلح حاله بعد الجواز ويكون غير كدا"، متابعة: "نزلت بطولي ما أخدتش أي حاجة دهبي خلعهولي وراح اشتكى إني أخدت الذهب ونازلة مع الصحفية والكاميرات".
وعلقت عن ادعائه بأنها كانت طالبة ديلفري، قبل استغاثتها بوالدها قائلة: "حوارات بتحصل وكل يوم بسمع كلام كذب في كذب أنا عايزة الناس تقف جنبي لحد ما آخد حقي بس وبقول يا رب انصرني لأني تعبت جدًا وشوفت اللي ماحدش شافه وماما بتهون عليا وتقولي استحملي، وأنا قوية بيكم".
