الست مش مُلزمة
بمناسبة التريند اللي منتشر الفترة دي "الست مش ملزمة" للأسف زود إتهامات النسوية إنهم سبب خراب البيوت اللي المجتمع بقى بيتّهم بيها أي ست بتدافع عن حقها إنها بتخرب بيتها و بتمشي ورا النسويات.
بس الحقيقي إن إرتفاع معدلات الطلاق وخراب البيوت مش سببها إن الست عايزة تحط رجل علي رجل في البيت و تتدلع ولا انها عايزة تبقى ند بالند للراجل.
والتريندات والأخبار اللي بتجيب أسباب غريبة للطلاق و بتبقي حالات نادرة ملهاش علاقة أبدا بالمشاكل الزوجية اللي بتؤدي فعلاً للطلاق وخراب البيت، ولا لو روحتوا محاكم الأسرة هتلاقوا إن الستات ظالمة وبتفتري علي أزواجهم.
وفي مجتمعنا حقيقي الست ضعيفة والكل جاي عليها، وثغرات القانون وتكاليف القضايا بتخلي الست أوقات كتير تستحمل ما لايمكن إستحماله عشان تعيش حياة سيئة بس أهون من الأسوأ اللي هتشوفه لو طلبت الطلاق. وده مش عدل أبدا وفي نفس الوقت مش تشجيع علي الطلاق خالص
بس لما المظلوم يقرر إنه يخرج عن صمته ده حقه وبينقذ نفسه
كان دايما بيتقال للست اللي بتتعرض لاذى من جوزها.. استحملي عشان خاطر عيالك، وعشان هتموتي وتموتيهم من الجوع، أصله لو طلقك هتترمي في الشارع، أو استحملي ما كل الستات بتستحمل هو انتي كنتي أحسن منهم.
أو يتوجد أي مبررات للراجل على اذية مراته، بيضربك؟ أكيد بتستفزيه
بيعرف عليكي ستات؟ أكيد ناقصك حاجة أو مش مهتمية بيه
مش بيهتم بيكي؟ أصله أكيد مشغول
مش بيصرف عليكي؟ عيشي باللي يدهولك وخلاص.
لما الست تعرف إنها مش درجة تانية، وأن ليها حقوق وأنها طالما كده كده بتشتغل بلقمتها في البيت وفي الأخر لو اتطلقت ممكن فعلاً تترمي في الشارع وميبقاش ليها مكان تقعد فيه ولا فلوس تصرف منها.. وعرفت إن شغلها ده اللي باقيلها وهو سندها الحقيقي، وعرفت إنها ممكن تحصل علي لقب مطلقة أحسن ما تفضل في علاقة مؤذية .. وإنها مش مذنبة لو قررت تطلق والاب قرر أنه يطلق ولاده معاها.. ده ذنبه هو ومش ده اللي المفروض يحصل.
وإنها إنسانة ليها الحق انها تعيش بكرامتها مع راجل يصونها ويكون قد كلامه معاها.. وميعاملهاش علي انها خدامة عنده وإن العلاقة الزوجية مبنية علي طرفين كل طرف فيهم ليه واجبات وليه حقوق والأتنين ليهم رغبات ومشاعر وأي تقصير أو خلل يحاولوا يظبطوه.
وده مش معناه أبدا أصل الست مش ملزمة بانها تطبخ أو تراعي بيتها أو تربي ولادها، وتفضل تطلب من جوزها طلبات فوق استطاعته.
مش المطلوب أن الراجل يبقي عبد عند الست ولا الست تبقي عبدة عند الراجل
الجواز شراكة وربنا شرع الحقوق والواجبات في حالات المنازعات، لكن في الاصل هو المودة والرحمة مش هنعيش حياتنا بالورقة والقلم.. والحياة تغيرات ومقدرة كل واحد بتتغير يوم عن التاني وبنتعب وبنقوى.
فليه يبقي اللي بيطالب بحقوقه هو سبب الخراب مش اللي بيظلم وبيغذي فكر الذكورية، وأن الراجل هو السيد والافضل، وليه كل الحقوق والست عبدة عنده هو يأمر وهي تنفذ.
النسوية مش عايزة الست تبقي زي الراجل.. هي بس عايزة الراجل يقوم بدوره والست تقوم بدورها.
في نمط ذكوري خلي الراجل فاهم الحياة غلط، اتربى غلط للأسف.. الأم بتفضل تدلعه وتخدمه لحد ما يتجوز، وبعدها بيبقي مطالب من مراته إنها تقوم بدور أمه شايلة مسئوليته كاملة وهو كل دوره يروح الشغل الصبح ويرجع ملوش أي دور فبيقول أنا مش ملزم اساعد في البيت، أنا مليش دعوة بشرى الطلبات، ولا إني أشيل الأطفال، ولا إني اذاكرلهم، ولا أودي تمارين، ولا اروح مع مراتي الدكتور ولو تعبت تروح لاهلها.. ده في أزواج لما مراتاتهم بتولد بتروح لأهلها لحد ما تبقي كويسة، هو ملوش أي دور متعلمش ومعرفش إنها لما تتعب هو اللي يشيلها، ويمرضها، ويأكلها.. ففكرة مين ملزم دي محتاجة كلام كتير اوووي ملخصه أن علاقة الزواج سكن وأمان ومودة ورحمة
كلها معاني واحاسيس حلوة بتحتوي المشاكل وبتخليها تعدي باحترام وبتخلي البيت دافي وجميل.
حبوا بعض واحترموا بعض وقدروا مجهود بعض واختاروا الناس الصح اللي ينفع تعيشوا معاهم،
اللي بيهم تطبقوا بيه كلام ربنا، بسم الله الرحمن الرحيم:
«وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِّقَوْمٍ يَتَفَكَّرُونَ».
وساعتها مش هنحتاج نقول ملزم، ولا مش ملزمة،
لكن الخراب بيجي من النطاعة وانعدام المسئولية، وعدم الاحترام والتقدير وخيانة المشاعر الأمانة من أي طرف من الاتنين.
احنا بنشيل سوا.. بالاتفاق والتفاهم بنتعلم نشيل مع بعض ونبني البيت مع بعض.. حسب قدرات كل واحد بدون تزييف.
الجواز مش حرب.. يا تبقي علاقة مريحة للطرفين يا بلاش منها خالص.
