بكرتون وورق.. رحلة فتيات لصناعة ألعاب الأطفال تشجيعًا على الصلاة (صور)
(آلاء، رضوى، نور).. 3 فتيات اجتمعوا على رسم البسمة على الأطفال وتنمية قدراتهم العقلية والذات لديهم من خلال عمل لهم لعب بالكرتون والورق المقوي تشجعهم على الصلاة مع اقتراب شهر رمضان، وكيفية عمل فانوس رمضان، والزينة من صنع أيديهم، وسعوا لتقديم ألعاب تفاعلية نقدم فكرة مختلفة تفيد الأطفال وعمل ورش للأطفال للعب معهم في أعمار مختلفة.
تروي آلاء خالد، 25 عامًا:"اللعب تساعد على التفكير والابتكار وقررنا نبدأ أنا وأصدقائي مشروع وهو عبارة عن لعب اطفال بس بطريقة مختلفة ومبتكرة مش زي اللعب العادية لعبنا مبنية على مبدأ STEM وهو اختصار العلوم والتكنولوجيا والهندسة والرياضيات ولعبنا بتعتمد على مشاركة الأب والأم مع الطفل في عمل تجربة علمية أو تركيب مجسم أو أدوات كهربائية وهي مش مجرد لعب بتتجاب للطفل يلعب بيها وخلاص، لكن هى عبارة عن ذكرى جميلة بتفضل بين الأهل والطفل".
تقول آلاء: "فكرتنا الأساسية أن الأطفال يعملوا تجارب في البيت بمشاركة الأم أو الأب وأن كل حاجة يعملوها بنفسهم سواء كان كهرباء بيركبوها أو مجسم بيبنوا أو تجربة بيحطوا الكيماويات ويكتشفوا النتائج بنفسهم وإحنا بناخد فكرة اللعب العادية وندخل فيها أسس علمية زي مثلا لعبة السلايم الأطفال كلهم بيحبوا إحنا خليناهم يعملوا بنفسهم 5 أنواع ويدخلوا في كهربا ومغناطيس ويخلوا ينور في الضلمة ويعمل بركان و نفس الفكرة على باقي اللعب".
وواجهت الفتيات صعوبة في البحث عن الخامات في بداية المشروع بالإسكندرية، ما دفعهن مع مرور الوقت للذهاب إلى القاهرة لشراء ما يحتاجونه من خامات وأدوات، وتتمنى الثلاث فتيات أن تصبح ألعابهم ذو طابع خاص، وبراند عالمي للعب الأطفال في مصر والوطن العربي.
