اتجوز عليا واحدة من سن أولادنا.. «وفاء» تطلب إنهاء 33 عاما من المعاناة

تقدمت سيدة تبلغ من العمر 54 عاما لمحكمة الأسرة بمدينة نصر، لرفع دعوى طلاق للضرر رقم ٤٢٢ لسنة ٢٠٢٠، لزواج زوجها من فتاه من عمر أبنائهم، على حد قولها.

وقالت "وفاء. ع"، في دعواها: "عشت معه 33 سنة وخلفنا 3 أبناء كلهم مهندسين، اتحملت كل مساوءه عشان تربية ولادنا في جو هادي من غير مشاكل، وكانت مشكلتي الرئيسية معه هي بخله عليا ووولادي وتنزيه نفسه فقط من أكل ولبس ولا يهمه أمر حد غير نفسه حتى في مرضهم لا يسأل عنهم، لحد ما اضطريت أشتغل محاسبة في شركة لمساعدة ولادي".

وتابعت الزوجة: "بعد كل العمر ده اكتشفنا ارتباطه بعلاقة مع فتاة من عمر ولادنا، وأخدت منه كل فلوسه اللي حصل عليها بعد خروجه على المعاش، اتكلمت معاه بكل ود واحترام وطلبت منه يبعد عنها عشان ولادنا، لكنه ضربني وطردني من شقة الزوجية، ولما حاول ولادي يرجعوني لقيناه اتجوز الفتاة وسجل لها شقتي باسمها، عشان كده لجأت للقضاء لرفع دعوى ضده".