دينا الشربيني: «كلمة تريند مرعبة بالنسبة لي وعام 2022 كان مليان سعادة»
قالت الفنانة دينا الشربيني،: "أنا من الشخصيات اللى بتحب تصحى بدري، رغم إن العمل الفني مواعيد التصوير فيه متغيرة ما بين الليل والنهار".
وقالت خلال مداخلة هاتفية لبرنامج خلاص صحينا تقديم مارينا المصري على ميجا اف ام، : "طلعت من 2022 بشخصيات كتير أثرت فيا، وإن شاء الله السنة الجاية تبقى أحلى، ومتفائلة جدا ب 2023.
وأوضحت أن أهم ماتعلمته ف 2022، هو التركيز مع الأهل وإعطائهم مزيد من الوقت والطاقة نظرا لافتقادها وقت العائلة، مرددة: "نفسي على قد ما بدي وقت لشغلي وحياتي لازم أركز برضه مع أهلي وأديهم من وقتي وطاقتي بشكل أكبر شوية".
وأوضحت أن أكتر أغنية سعدت بها كانت "إيه اليوم الحلو ده" لأحمد سعد، وأكتر أغنية أبكتها هى أغنية محمد حماقي "ما بلاش"، وردت على سؤال ايه اكتر اعمال عجبتك، فقالت فيه أعمال كتير عجبتني السنة دي، بس أكتر عمل عجبني هو مسلسل زينة "الليلة واللى فيها"، و نفسى أسلط الضوء أكتر على الأطفال والمرأة، عشان كده عجبني جدا مسلسل "فاتن أمل حربي" لنيللي كريم.
وعن أكثر الأعمال متعة خلال عملها بها، أكدت أنه مسلسل "كامل العدد"، والذي تقوم بتصويره حاليا لعرضه في رمضان 2023، مؤكدة أنها لاتتابع السوشيال ميديا بكثرة ولكنها تفضل التعامل مع تطبيق "تيك توك"، معتبرة أن كلمة "تريند" مرعبة بالنسبة لها ولاتحبها
وواصلت: " أكتر حاجة اتغيرت فيا السنة دي هى إن عصبيتي بقت أقل، ودي حاجة مش سهلة، لأني شخص عاطفي جدا، وكل مشاعرى بتبان عليا، وأنا الحمد لله على طول كويسة نفسيا، وبقيت أقدر أعمل كنترول على مشاعري، ومش بسمح لأي حاجة تزعلني، ولقد كان عاما مليئا بالسعادة، بالنسبة لدينا الشربيني الحمد لله".
