تكلفة المشروع 4 مليارات جنيه.. رسائل مهمة للرئيس السيسى من مصنع الرمال السوداء بكفرالشيخ

افتتح الرئيس عبد الفتاح السيسي، اليوم، مجمع مصانع للرمال السوداء بمدينة البرلس بمحافظة كفر الشيخ، والذي يُعد واحدًا من أهم المشروعات القومية بمصر، والأحدث من نوعه على مستوى العالم باستخدام تكنولوجيا التعدين المتطورة.

ووجه الرئيس خلال افتتاحه مصنع الرمال السوداء بكفر الشيخ، عددًا من الرسائل المهمّة للمواطنين وأصحاب الشركات والقطاعات الخاصة، يستعرضها «الدستور» في السطور التالية:

رسائل الرئيس السيسى للمواطنين من مصنع الرمال السوداء

• لازم المصريين يفهموا القصة كلها عشان محدش يمكن سمع قبل كده عن الرمال السوداء.
• محدش شجعنا في الأول على مشروع الرمال السوداء، لكن بعد دراسات جدوى ظلت 3 سنوات الأمر اختلف.
• مكنش عندنا فرصة عشان نفكر في غير كده.
• يمكن المصريين أول مرة تشوفونا وإحنا بنفتتحه، لكن إحنا تابعنا العمل، دي فلوس بنحطها وعندنا أمل تجيبلنا حاجة عشان تقوم البلد قدام.
• بدأنا نعرف إن في رمال سوداء في مصر منذ 1922 و1930.
• لكن كإجراءات تتعمل علشان يطلق مشروع زي ده مجتش فرصة.
• دلوقتي عرفنا تفاصيله وبقى في حاجة خرجت للنور في هذا المشروع.
• بشكر كل القائمين على هذا العمل بمشروع الرمال السوداء.
• تكلفة مشروع الرمال السوداء 4 مليارات جنيه.
• لو القطاع الخاص عايز يعمل أكثر من مصنع، هيكون هناك عائد أكبر وبمبلغ مش كبير.
• الرقم اللي بنتكلم فيه مش كبير وتدار بعائد يزيد على 25%.
• كل منتج هيطلع من هنا هيتم تصديره.
• المنتجات اللي هتتصدر للخارج هتكون فرصة لوجود عائد بعملة أجنبية.
• أي حد بيشتغل في القطاع الخاص، بنقوله المشروع ده له عائد كويس أوي، شكّلوا مجموعات متوافقة مع بعضها.
• إنتوا أصدقاء بتشتغلوا مع بعض، المشروع ده هيخلص خلال سنتين.
• هيكون عندنا أكتر من مشروع، وبقولكم خلاص المسار اتاخد مش هتعيدوا دراسات من جديد.
• هناك أكثر من طريقة للمشاركة في مشروعات مقبلة.
• إنتوا هتكونوا رواد لهذا العمل، ربنا يجعل فيه الخير.
• الدولة تقدر تفتتح أكثر من مشروع.
• هنوفر فلوس كنا بنشتري بيها، ونوفر عملة حرة ونشغل ناس.
• متاح لكل الشركات تدخل في هذا المشروع.
• اللي عاوز يتفضل، والكلام ده بقوله في أي مشروع افتتحه.
• دراسات الجدوى بحجم الاحتياطيات تخليك تدخل تشتغل في الموضوع ده وأنت مستريح أوي.
• طلب السوق العالمي كبير جدًا يلبي أي منتج هيطلع.
• مستعدون لتوفير كل مواد الحماية للعاملين في مصانع الرمال السوداء، وتأمين البعد البيئي لهم.
• لازم نكون متحوطين، والناس مش شغالين يوم ولا شهر دول شغالين على طول، والناس دي أهلنا.
• عايزين نتأكد من خلال الدراسات والمعايير من مدى سلامة الناس اللي هشتتغل فيه.

افتتاح الرئيس مصنع الرمال السوداء

افتتح الرئيس السيسي، اليوم، مجمع مصانع للرمال السوداء بمدينة البرلس بمحافظة كفرالشيخ، ويعد هو الأحدث من نوعه على مستوى العالم باستخدام تكنولوجيا التعدين المتطورة، ويعتبر إضافة جديدة لسلسلة المشروعات القومية الكبرى التى تهدف إلى تعظيم الاستفادة والاستغلال الأمثل لموارد مصر الطبيعية، وتحقيق القيمة المضافة للمعادن المستخلصة من الرمال السوداء، التى تستخدم فى العديد من الصناعات الدقيقة، مما يفتح الآفاق لاستثمارات جديدة تدعم الاقتصاد الوطني وعملية التنمية الشاملة.