بعد تصدره التريند.. معلم التاريخ صاحب شخصية «طومان باي» داخل الفصل: بحارب الملل

علق محمد الجزيري معلم التاريخ علي تداول صوره بملابس تاريخية لطومان باي وقال: "انتشرت صورتي وأنا بشرح درس للصف السادس الابتدائي عن الصراع بين المماليك والعثمانيين واللي ارتديت فيه زي تاريخي يعبر عن " طومان باي" والحقيقة مكنتش متوقع الانتشار الرهيب للصورة لأني بعمل كده من 3 سنوات وعملت مسرحية محمد علي وشارك فيها الطلاب وعملت دور عمر مكرم".

وأضاف عبر صفحته الشخصية على فيس بوك: «وعن سبب اختيار فكرة الشخصيات واللي طبعًا أكتر من مدرس عملهم قبلي منهم : أ.محمد أبو الدهب في 2015  وأ.محمد العسكري واتعملت في مدارس خاصة في الدقهلية وأسيوط وغيرهم كتير».

واستكمل: «بالرغم من أن موقع Brightside اعتبر في عام 2016 أن صورة مدرسة التاريخ وهي بترتدي زي المصريين القدماء أنها من أهم 14 معلما في العالم بيبتكر في حصته، وانتشرت صورة مدرس في فرنسا يرتدي زي محارب من العصور الوسطى وأد إيه المُعلم ده حاز احتفاء كبير في الصحف الأوروبية، واحتفالات بيه في مصر وفضلنا: نمصمص شفايفنا، ونقول هما دول المدرسين اللي بجد".

وتابع المعلم: «بالرغم من كل ده هوضح بعض النقاط:
- مش بالضرورة كل حصة أعمل فيها شخصية تاريخية لأن ده هيتحول لملل بالنسبة للطلاب.
- أنا من أوائل المدرسين اللي نزلوا بطلابهم الأماكن التاريخية عشان الطلبة تشوف الأماكن اللي حصل فيها الأحداث ويحصل عندهم ربط ذهني بين تاريخهم.
-فكرة تشخيص الشخصيات التاريخية ده نوع من الاستراتيجيات الفعالة لتوصيل المعلومات التاريخية بشكل مختلف، واللي الطلبة شاركت فيها في نهاية الحصة بالإجابة عن ورقة أسئلة تتضمن أهم نقاط العرض اللي اتعمل قصادهم.
- الهدف الأهم بالنسبالي أن الاولاد يكونوا مبسوطين ويحصل عندهم تنوع في شكل الحصة واللي بالمناسبة كل حصة بتكون ليها استراتيجية مختلفة وهدف مختلف ومهارة الولد بيتعلمها.