«جوزى بيتعصب على أسباب تافهة».. متصلة تحكى مشكلتها فى «الستات» (فيديو)
وجهت أم محمد متصلة من الإسكندرية سؤالًا للدكتور نبيل القط استشاري الطب النفسي، قائلة: "أنا جوزي عصبي جدًا لدرجة إنه بيعلي صوته ويتنرفز ويكسر ويخبط في أي حاجة".
وأضافت خلال مداخلة هاتفية ببرنامج "الستات" المُذاع على فضائية النهار مساء الأحد: "ممكن يتنرفز على أقل حاجة، وبيضرب الأولاد على أتفه الأسباب".
ليرد الدكتور نبيل القط قائلًا: "طب هو عارف إنه عنده مشكلة، وهل بيلوم نفسه بعد ما يعمل الحاجات دي وبيرجع في كلامه ويحس إنه عمل حاجة مش كويسة؟"، لترد المتصلة: "لا إطلاقًا خالص مبيعملش ده".
وتابعت: "هو بيقول متنرفزونيش لما أكون جاي من الشغل، هو مشكلته لو أي حاجة جت ناحيته بيتعصب".
وأضافت: "هو وأولادي أهم حاجة عندي في الدنيا، ساعات بجيب لهم حاجات ومجبش لنفسي، وأما اجيب لنفسي بيزعل ويغير جدًا ويقولي أنتي بتجيبي لنفسك وأنا لا وأشمعنى".
ورد القط قائلًا: "إنتي لما بتقوليله أنا بتعب أما بتغلط فيا، مش بيتعاطف معاكي؟"، لترد المتصلة: "لا بيتجاهلني تمامًا ويسيب المكان ويمشي".
جوزي ممكن يقعد باليومين ميكلمنيش اعمل إيه؟
واستكملت: "ممكن يقعد باليومين والثلاثة ميكلمنيش، وبعمله كل حاجة لبسه وأكله بس مش بيكلمني غير أما أنا ارجع وأكلمه".
ووجه القط سؤالًا للمتصلة قائلًا: "إمتى بيقولك شكرًا وأنا مبسوط"، لترد قائلة: "هو مش بيقول إلا أما اسأله بشكل مباشر".
وتابعت: "أنا من الناس اللي بتهتم بالمناسبات، بجيب هدايا في أعياد الميلاد وأعياد الزواج، لكن هو مش بيقولي حتى كل سنة وانتي طيبة".
فيما رد الدكتور نبيل القط على المصتلة قائلًا: "إيه الحاجات اللي بتحبيه علشانها؟"، لترد: "هو طيب مهما يثور ويتعصب ومش بيتأخر عليا أما بكون محتاجة حاجة ومش بيتأخر عني وكريم معايا".
