المركبة اتخرمت وبايظة.. تفاصيل فقدان قبطان مصرى فى المحيط الهندى (فيديو)
تداول رواد السوشيال ميديا على محركات الإنترنت صورًا للقبطان المصري سامح سيد المفقود في مياه المحيط الهندي.
وقد تداول مستخدمون على موقع «فيسبوك» منشورًا لأحد أصدقاء القبطان المفقود سامح سيد، يقول فيه: «أخويا مفقود في عرض البحر وفاضل يومين إنه يقدر يعيش من غير أكل ولا شرب ومحدش بيتحرك، القبطان سامح سيد شعبان كامل، خريج دفعة ٢٠٢٠/٢٠٢١ من الأكاديمية البحرية الأردنية».
وقال: «سامح اشتغل على مركب تجارية سافرت بيه شهر 2 (فبراير)، وكان بيتواصل معانا كل فترة، والشهر اللي فات بعتلنا إن المركبة اتخرمت وبايظة والناس مش عاوزين ينزلوهم ومكملين بيهم وبيلحموا السفينة، وركبوا من اليابان وبعدين راحوا كوريا والصين لحد جزر المالديف والسفينة مخرومة».
وأضاف: «سامح مصور لنا كل حاجة صوت وصورة والمركب بتدخل مياه، وفي يوم 20 يونيو عملوا مشاكل مع القبطان ورجّعوا واحد مصري من الإسكندرية من كتر المشاكل اللي عملوها يوم 14 يوليو، وغرقت المركب وعلى متنها ١٢ فردًا من الطاقم، ونزلوا في زورق في نص المحيط الهندي وعملوا استغاثة».
وأكد: «على أن أقرب سفينة ليهم كانت على بعد ١٢ساعة، وبعد ساعة من غرق السفينة وقع القبطان سامح من الزورق في المياه والموج أخده بعيد عن الزورق، وحاول صاحبه القبطان محمد جمال يلحقه بس للأسف البحر أخد الاتنين، كانوا لابسين لايف جاكيت وبعدوا عن المركب».
وأوضح: «أنه بعد 10 ساعات من الحادث الزورق باظ وبعدها بساعتين السفينة جت أخدت الـ10 الفاضلين من الـ12 فرد اللي كانوا على الزورق، وسامح ومحمد مش موجودين، ومش طالبين غير أن الناس تقف معانا عاوزين صاحبنا وأخونا حتى لو جثته، ده ولد وحيد أمه اللي بتموت عليه لا عارفين هو عايش ولا ربنا توفاه».
وأعلنت الأكاديمية الأردنية للدراسات البحرية عن أن طالبها السابق القبطان سامح سيد، وأحد أفراد طاقم السفينة غير معلوم مكانهما أو محدد مصيرهما حتى الآن.
وأضافت الأكاديمية الأردنية، في بيان، مساء الأربعاء: «تتابع الأكاديمية الأردنية للدراسات البحرية الأخبار المتداولة حول غرق إحدى السفن في المحيط الهندي والتي كان على متنها طاقم من ١٢ فردًا».
وتجدر الإشارة إلى أن السفيرة نبيلة مكرم، وزيرة الدولة للهجرة وشئون المصريين بالخارج، تحركت على وجه السرعة، وطلبت الأوراق الخاصة بالمصري سامح السيد، وأكدت أنها في تواصل مع السفارة المصرية بالأردن لمتابعة الموقف.
