ليفل جديد.. أصل هى اللى استفزته!
فاكرين من كام سنة لما حصلت حادثة تحرش في الحرية مول على بنت ولما شتمته راح ضربها وطلع الفيديو من كاميرات المراقبة واتذاعت في كل القنوات؟
وكالعادة كان في ناس بتبرر اللي حصل ده للبس البنت وليه ترد عليه أصلا! ماكانت تعمل نفسها مش سامعة، أصل مشيتها، أصل ضحكتها، وأي مبررات وخلاص.
البنت وقتها عملت محضر والولد خرج منه بكفالة بكام يوم، وبعدها بسنتين اتعرضلها تاني في الشارع وشوهها بسكينة في وشها وهي قالت إنه كان مهددها إنه هيدبحها بس جت في وشها وربنا كتبلها عمر جديد.
وساعتها اتقال مبررات كتير أصل هي طلعت تعرفه وقررت تقطع علاقتها بيه! أكيد استفزته أصل البنت ليها صور بلبس مش ولابد و و و .
وبدل ما يكون سيد الموقف إزاي حد يتجرأ ويعمل كده في بنت ومش خايف منحد وإزاي نخلي البنات تنزل في شوارع مصر وتبقى حاسة بأمان، لأ! بقى في مشادات بين اللي بيبرر له وما بين اللي بيدافع عن لبسها!
وده للأسف مشهد متكرر شافته كل بنت قررت إنها تاخد موقف ضد أي حد يتحرش بيها في الشارع، بيوصل بيها الحال إنها ممكن تتضرب من المتحرش عشان شتمته لما إتحرش بيها! إنتي اتجننتي ولا إيه؟ ده هو اللي يلم عليهاالناس عشان يقولهم هي إزاي نازلة في الشارع كده ماتتقوا الله!
ولو قررت تعمله محضر، هتلاقي كلام كتير من نوعية ما خلاص بقي هو عمل إيه يعني كان قتلك؟ هتضيعي مستقبله عشان مد إيده عليكي؟ وبعدين المحضر اللي عايزه تعمليه ده هيبوظ سمعتك أنتِ مش هو!
ولو صممت هتلاقي تهديدات منه ومن أهله ويتعمل عليها كماشة لحد ما تُجبر إنها تتنازل عن المحضر.
وبقي الحل السائد إن يا بنتي لو حد ضايقك وأنتِ ماشية في الشارع بصي الناحية التانية واعملي نفسك مش سامعه .. لو لمسك أجري في صمت عشان ميتجرأش عليكي أكتر من كده!
وده مش في الشارع بس ده بيحصل في المواصلات العامة ولما البنت بتصوت وتحاول تدافع عن نفسها أوقات كتير بتلاقي هجوم عليها من اللي حواليها ويكونوا متعاطفين مع المجرم اللي اذاها مش معاها هي!
لكن وصلنا لليفل جديد بقي ...
أن تحصل جريمة قتل في الشارع .. واحد يدبح واحدة في الشارع قدام كل الناس ومحدش قدر يلحقها ولما المحكمة حكمت عليه بإعدام تظهر نفس نوعية الناس اللي فوق دي تاني .. "حرام الولد يضيع مستقبله ماهي اللي استفزته، بصوا صورها، بصوا لبسها" !!!!!
فعلا؟؟؟
يعني لما كان تحرش بس قلتوا هو عمل إيه يعني كان قتلها؟ ولما بقي في قتلرجعتوا تقولوا أصلها استفزته؟؟
أنتم متخيلين المستوي اللي ممكن نوصله بعد كده ايه؟
هو طبعا القرار هنا قرار محكمة مش بحكم الرأي العام
بس الفكرة في درجة وعي الناس باللي بيحصل؟
عارفين في كام بنت بتتعرض لتهديدات أو ابتزاز عشان رفضت واحد بيقولها أنابحبك وأنتِ بتاعتي ومش هسمح تكوني لحد غيري؟
مفيش مبررات أبداً لأي تعدي من أي نوع ... مينفعش نتعاطف مع مجرمين ونشوف الأسباب إيه.
كان في زمان سفاح في أمريكا اسمه "جيفري دامر"، واتعمل على قصته أفلام رعب كتير، جيفري قتل أكتر من ١٧ شاب، وكان بيحتفظ بجزء من جسمهم عنده كتذكار .. كان في ناس متعاطفة معاه، وقالوا أصله ياعيني كان ناقصه حب وحنان، وكان كل اللي عايزه أنه يلاقي حد يفضل معاه وميبقاش وحيد والأغرب أن في بنات تخيلته فتى أحلامها!
ومع إن القصة حقيقية والتعاطف كان حقيقي، لكن عمري ما كنت اتخيل أنهبجد وإني أشوفه حقيقي قدامي.
ده رعب والله .. التعاطف مع المجرمين مرعب أكتر من الجريمة نفسها.
يعني أنا نفسي بعد الجريمة البشعة اللي حصلت يحصل وقفة ويتم النظر فيكل ملفات العنف اللي بتحصل ضد البنات بشكل عام، سواء مطاردات باسم الحب أو التحرش و كأن البنات حق مكتسب طالما ماشية في الشارع أو لابسة لبس ملفت في وجهة نظر المتحرش.
العنف تجاه الستات من المجتمع والنظرة إنها السبب في كل تعدي بيحصلها وأنها مذنبة وأنها تسكت وتتنازل عن حقها، لازم ينتهي.
