بعد إيقافه.. السوشيال ميديا تحتفي بوقف إعلان «دايس»: «خطوة سليمة»
أثار إعلان شركة "دايس" للملابس القطنية استياء وغضب كبير بين رواد مواقع التواصل الاجتماعي فيسبوك وتويتر ووصفوه بأنه يتنمر على الفقراء بسبب تمثيل الإعلان طبيبًا يرفض الكشف على أحد المرضى بسبب قطع في الفانلة الداخلية وشرابه.
يقدم "الدستور" في التقرير التالي ردود فعل رواد "فيسبوك" على إيقاف الإعلان والتي جاءت كالتالي:
قالت مروة محمد: "عاوزة اتكلم عن إعلان دايس اللي كلكم شوفتوه بتاع المريض اللي لابس مقطع والدكتور والممرضة.. أنا أول ما شوفت الإعلان مخدتش بالي منه أوي عشان كنت قاعده مع عيلتي وكلنا بنتكلم بس بعد ما لقيت الناس بتتكلم عنه وإنه إعلان مسيء اتفرجت عليه وشكرت ربنا مليون مرة إني كنت بتكلم مع عيلتي ومحطنيش في الموقف ده إنهم مطلعين الممرضة شخصية شمال بكل معنى الكلمة، الممرضة والدكتور بيتريقوا على مريض والممرضة تقول له ملابسك الداخليه بتفكرني بصاحبي القديم تخيل القذارة والزون اللي مصريين يحطوا التمريض فيه، نقابة الأطباء فورًا عملت اعتراض وقدمت شكوى لوقف الإعلان هل نقابتنا الشفافة هتعمل حاجه؟ ويا تري لو عملت هل هتعمل عشان نقابة الأطباء تحركت وميبقاش منظرها وحش أكثر ما هو ولا عشان تجيب حق التمريض بعد دة كله وبعد اللي عملناه عشان البلد مُصريين إنهم يحطوا التمريض في زون الشمال، مش عارفه أقول إيه غير حسبي الله ونعم الوكيل ألف مرة، اعملوا اللي انتوا عايزينه عشان تزهقوا التمريض في عشته وتخلوه يهاجر وإحنا من عنينا نهاجر مفيش مشكله لأن دة اللي في الغالب بيحصل، شوفوا مين هيقعدلهم في البلد بقي وابقوا جيبوا تمريض من الشارع وتمريض شمال زي ما انتو بتطلعوه كدة يعالجكم لأن دة اللي يليق بيهم فعلًا".
ومن جانبه طالب الدكتور جمال شعبان في منشور سابق له بإيقاف الإعلان وكتب: "أوقفوا هذا الإعلان المستفز اللي بيسخر من ملابس الشاب الداخلية المتبهدلة والمخرومة مفيش دكتور بيتريق علي ملابس عيان مهما كانت بسيطة أو بالية أو ممزقة".
وبعد إيقاف الإعلان كتب الدكتور جمال شعبان وقال: "تم إيقاف الإعلان المسيء الذي طالبنا بإيقافه شكرًَا للمجلس الأعلى للإعلام يبقي الفيسبوك صوت الشعب الحقيقي".
وكتبت صفحة السلامة أولًا: "هي نقابة التمريض متكلمتش ليه عن إعلان دايس ولا عن اللي جايبنها تعمل دور ممرضة وتقوله انت شبه صاحبي القديم مكنش بيلبس دايس، نقابة التمريض بتفضل عامله ودن من طين وودن من عجين لحد ما نقابة الأطباء تاخد موقف وبعدين تركب معاهم أما لو الإهانة خاصة بالتمريض فقط، فالنقابة بتغض بصرها".
وقال أشرف العمدة: "إعلان دايس للملابس الداخلية!! من أسوأ إعلانات التنمر والسخرية من الفقراء والناس البسيطة فكرة قذرة واستهانة بالناس البسطاء فكرة الإعلان عن شاب فقير ملابسه الداخلية ممزقة لأنه ليس معه نقود يشتري ملابس داخلية ماركة دايس!! فيسخر منه الطبيب والممرضة ويقول للشاب انك مش لابس دايس طب اطلع برة مش هكشف عليك يجب وقف هذا الإعلان فورا الحقيقة.. وفين دور نقابه الأطباء من الصورة اللي ظهر بيها الطبيب في الإعلان القذر ده؟؟!".
