أسما شريف منير تواجه والدها برأيها فى أعماله
بدون مناسبة، وجهت أسما ابنة الفنان شريف منير، رسالة إعجاب كبيرة لوالدها عبر صفحته على موقع تبادل الصور والفيديوهات "انستجرام".
واحتوت الرسالة على رأي أسما شريف منير في أعمال والدها الفنية والإبداعية، كما تحدثت عن بعض تفاصيله الشخصة.
وقالت أسما في رسالتها: «سيبكوا تمامًا من إنه أبويا بس أنا عايزة أقولكوا رأيي فيه كممثل، هو عمل أصعب معادلة في التاريخ وهي حفاظه علي مكانته، بحترم فيه جدًا قوة رفضه حتى لو كانت الظروف بتجبره على أنه يشتغل، إنه زيه زى أي حد عنده بيت وعيال ومصاريف، بس دة مخلاهوش ينحت".
وأضافت: «بيتعب جدًا في شغله وبيبذل مجهود في تفاصيل الشخصية اللي بيلعبها، صبغ شعره أصفر، اهتم بصحته ولعب رياضة، عمل ست بكل تفصلها، اتعلَّم رماية (عشان لو جاله دور ماسك فيه مسدس وبينشن علي حاجة متبقاش مصطنعة)، وركوب الخَيل، وأخد دروس عبري عشان ولاد العم، وعمل كمان حركة ذكية بيعمل أدوار تبان إن هي شبه بعض زى مثلًا لما عمل ست، ناس كتير ممكن تقول: أنا مش هعمل دور ست مرتين، بس هو عمل ست في (حزمني يا) كوميدي، وعمل دور ست في (هستيريا) دراما توجع القلب".
وتابعت: «من الفنانين القليلين جدًا اللي معندوش مانع يخاطر مع مخرج جديد وكمان عمره ما استكبر إنه يشارك بطولة مع شباب جديد، الراجل ده فضل صامد ومحافظ علي مستواه الفني من ساعة ما بدأ لحد انهاردة وعدى عليه ناس كتير ولسه محافظ على مكانته الخاصة، أحب أشكره على مجهوده اللي عمله في حياته كلها، أنا بفتخر أن اسمي على اسمه، ربنا يحبب فيك خلقه دائمًا، أما بقي علاقتي بيه كأب اكتر واحد بيتخانق معايا وبيسمعني، صحبي جدا وبخاف منه (احترامًا ليه) لا وبخاف منه برضه، مرة جوزي كان بيحضني قدامه جريت ونسيت إنه عادي، حنين وصارم وطيب، اتعلمت منه كتير أوي وشبهه في حاجات كتير، سندي وضهرى».
