ناهد رشدي عن تريند «الست مش ملزمة»: «كلام فاضي ورفضت أعمال حلوة بسبب ولادي»
علقت الفنانة ناهد رشدي، على تريند «الست مش مُلزمة»، مؤكدة أن الأم هي الأساس بالنسبة لأولادها، وليس من الطبيعي تخلي المرأة عن دورها وواجباتها تجاه الأسرة والأبناء.
وقالت خلال مداخلة هاتفية لبرنامج «٨ الصبح»، والمُذاع على فضائية «dmc»: «ده كلام فاضي وكل الأديان بتقول كدا، الأم هي الأم.. والطبيعة بتقول الأم ملزمة بكل حاجة، يعني إيه طفل ميرضعش ومعملش أكل وأخدمهم».
وأضافت ناهد رشدي: «كنت بقوم الساعة 6 الصبح أعمل لولادي كل حاجة، واعتمدت على أمي وحماتي في فترة، لكن بعد كده كنت بعمل كل حاجة بنفسي، واعتذرت عن شغل حلو أوي كتير عشان ولادي، وابني رفض عمل فني حلو عشان كان عاوزني جنبه».
وتابعت: «اللي بيحصل دلوقتي سببه التريند، إحنا عاوزين الأسرة المصرية الجميلة والأم اللي بتستحمل، أنا بقالي 40 سنة متجوزة، وده مش معناه إنه مكانش في مشاكل، بس في أم بتحتوي المشاكل عشان ولادها».
