المنتجة مها سليم: لائحة الأجور المنتشرة "مضروبة" وبلاش تقعوا فى الفخ
نفت المنتجة مها سليم، عضو اتحاد منتجي مصر، الذي تم تدشينه مؤخرًا، حقيقة لائحة الأجور المزعومة المنتشرة مؤخرًا، والتي تعتمد على تقسيم فناني وصناع الدراما المصرية إلى فئات مختلفة، واعتماد أجور مختلفة وامتيازات متباينة وفقًا للتصنيف، مما أثار حفيظة البعض.
لائحة أجور الفنانين المسربة
وقالت مها، عبر حسابها على "فيسبوك: "محدش قال إننا عايزين نخفض أجر حد أبدًا، ولا حد هايقبل إن ده يحصل.. كل الحكاية إن فعليًا الصناعة في أزمة كبيرة بتهددنا كلنا، إننا نلجأ لحل من ٢ يا الإنتاج يقل وبشكل كبير جدًا، وده خراب بيوت كبير لناس كتير ابتداء من المنتج إلى أصغر عنصر في المنظومة الإنتاجية، أو إننا ننتج أعمالًا بجودة ضعيفة ودون المستوى، وده مش الإنتاج المصري اللي ليه مكانته في الوسط العربي كله".
وأضافت: "كل اللي حصل أننا بنحاول نقنن الارتفاعات المبالغ فيها من قبل بعض العناصر، وده شىء مش غلط أبدًا؛ حفاظًا على صناعة مهمة، وبيوت ناس كتيرة مفتوحة منها.. السؤال هنا مين اللي مصلحته إنه يخلق الخلاف الكبير اللي حاصل ده ومن لا شىء؟!!.. مين اللى عمل لائحة غير مظبوطة إطلاقًا ومش موجودة عند أي منتج أو لدى اتحاد المنتجين من الأساس؟ مين قاصد إننا يبقي بينا كم المشاحنات والخلاف اللي موجود وكأننا طرفين وليس طرف واحد؟!".
واختتمت: "العلاقة بين القنوات والمنتج والقطاعات الإنتاجية كلها واحدة ومرتبطة ببعض، ولازم كل الناس تفهم أن العالم كله عنده أزمة اقتصادية كبيرة مش إحنا بس، وهنا واجب كل واحد فينا إنه يحاول يساعد حفاظًا منا على بيوتنا وبيوت الناس المفتوحة.. أرجوكم بلاش تقعوا في فخ التوقيع بينا.. إحنا واحد في صناعة واحدة محدش بيشتغل فيها إلا لو بيحبها".
