"الخسارة فيك كبيرة".. الدكتور محمد الباز ينعى الفنان مصطفى درويش

نعى الدكتور محمد الباز، رئيس مجلسي إدارة وتحرير جريدة الدستور، الفنان مصطفى درويش، الذي توفي اليوم الإثنين بشكل مفاجئ عن عمر ناهز 43 عامًا.

ونشر الدكتور الباز، صورة للفنان الراحل من داخل مكتبه بجريدة "الدستور"، وعلق عليها قائلًا، " حسنة مصطفى درويش المخفية، الله يرحمك يا مصطفى يا درويش، بدرى أوى يا أخي، عارف إنك هتقولى : يا عم هو إيه اللى بدرى ما كلنا مروحين… إحنا بس اللى مش واخدين بالنا إنها رحلة قصيرة أوى".

وأضاف «الباز»: ببهجته وحيويته وإقباله على الحياة وشغفه بأن يلمس النجوم بيديه كنت أشعر أن مصطفى درويش ابن موت، قالها لى مرة: أنا حاسس إنى مش مطول. مصطفى مكنش جدع.. مصطفى كان المجدعة نفسها، كنت عارف إنه ومجموعة من أصدقائه واخدين شقة عشان يجمعوا فيها مساهمات من أهل الخير فلوس وأكل وهدوم، وكان بيدور بنفسه على المحتاجين عشان يساعدهم ويقف معاهم".

وتابع الدكتور محمد الباز: "كان بيبقى فرحان بمساعدة الناس أكتر من أى عمل فنى جديد: هو ده يا دكتور اللى هيبقى، سألته مرة عن حكاية شقة الخير، قال لى وحياتك بلاش كلام فيها يا أخى، دى الحسنة المخفية اللى عايزين نقابل بها ربنا، بلاش تضيع الثواب، الخسارة فيك كبيرة يا مصطفى.. ربنا يجازيك خير بكل الخير إللى عملته".