هنادي مهنا تكشف كواليس تقديمها ونجاحها في «ذا فويس فرنسا» (فيديو)

قالت الفنانة هنادي مهنى، إنها كانت تتمنى في المرحلة الأولى من مسابقة "ذا فويس فرنسا" أن تغنى باللغة الإنجليزية لأنها كانت اللغة الأساسية لها في المدرسة، وقدمت ذا فويس بفرنسا ونجحت ووصلت لـ500.

وأضافت خلال حوارها مع الإعلامى عمرو خليل، عبر برنامجه "من مصر" المذاع على قناة "CBC"، "بعدها الدنيا أخدتني أكتر ورجعت مصر وكنت في الأكاديمية مع والدي، وبحب التدريس للأطفال، وعندى ذكريات كتيرة مع اللي درست لهم في الأكاديمية وحاليا في كلية طب وبفرح قوي بيهم".

تابعت الفنانة: "أول عمل شاركت فيه مسلسل أفراح إبليس، وكلمنى المخرج وتواصل معايا، ومحدش يعرف أنا بنت مين ومكنتش عاوزة استخدمها فى أى حاجة.. وجربت وكان الكلام بالصعيدى، ومش نزل وبقالى سنة كنت بمثل ومفيش حاجة تنزل".

واستكملت: "ولما نزل المسلسل في رمضان 2018 سافرت برا وزعلت، ورمضان 2019 كان أكثر سنة جالي فيها عروض كتيرة فيه.. وشاركت فى 3 مسلسلات فى نفس الوقت وكان وشاركت فى مسلسل حكايتي وزلزال وبركة، وكنت باخد البطانية معايا العربية عشان كنت بنام فيها لأن كنت بتنقل من تصوير مسلسل لمسلسل، وكانت سنة حلوة أوي".

عن دورها فى مسلسلها "مكتوب عليا" مع الفنان أكرم حسني، قالت هنادي مهنا: "أكرم كفنان بحبه جدا وبحب أغانيه جدا وعلى المستوى الإنسانى مجتهد جدًا ومبسوطة إن أنا اتعرفت عليه.. وشخصية الكوميديا فى المسلسل كانت صعبة عليا لكن الحمد لله ربنا كرمنى بالدور".

مسلسل "مكتوب عليا"، من بطولة أكرم حسنى، عمرو عبدالجليل، هنادي مهنا، حنان سليمان، إسماعيل فرغلي، عزة لبيب، محمد طعيمة، محمود السيسي، وهلا رشا، وعدد من ضيوف الشرف منهم فيدرا، والعمل من تأليف إيهاب بليبل، وإخراج خالد الحلفاوي، وإنتاج كريم أبوذكرى.
https://youtu.be/Rnss-sIfR50