رئيس مجلسى الإدارة والتحرير
د. محمد الباز
رئيس التحرير
وائل لطفى
رئيس مجلسى الإدارة والتحرير
د. محمد الباز
رئيس التحرير
وائل لطفى

الهداف التاريخى

مش عارف ليه كل شوية الموضوع دا يتفتح!
المعروف من سنين إنه الهداف التاريخي لـ النادي الأهلي هو محمود الخطيب، على أساس إنه هو أكتر لاعب سجل لـ النادي أهداف في مجمل المسابقات المحلية والقارية: الدوري والكاس وكاس أكتوبر ثم دوري أبطال إفريقيا وكاس الكئوس الإفريقية، دي مفيش فيها كلام.

لما نيجي لـ بطولة الدوري المصري وحدها، من غير أي بطولات تانية، فـ الخطيب وحسام حسن مع بعض بـ يشتركوا في نفس رصيد الأهداف: 109 هدف لـ كل أسطورة منهم، هي مصادفة غريبة، بس دا اللي حاصل قدامنا، لـ ذلك لو هـ نتكلم بس عن الدوري فـ الهداف التاريخي لـ الأهلي اتنين: بيبو والعميد.

المفروض القصة دي خلصانة، لكن كل كام شهر يتقال إيه: هم زوروا لـ الخطيب، بـ حيث أهدافه تزيد وتبقى قد حسام حسن، وما يبقاش حسام هو الهداف التاريخي، وبيبو ما سجلش لـ الأهلي في الدوري غير 101 هدف أو 102!

مش عارف بقى اللي بـ يطلع الكلام دا هو حسام نفسه، بعدين ناس كتير تمشي وراه، ولا العكس، فيه حد بـ يقول هذا الادعاء فـ الكلام يوافق هوى حسام فـ يردده، مش دا الموضوع، الفكرة بس إنه يعني لو حد عايز يزور أهداف لـ الخطيب، طيب ليه يخليه مساوي لـ حسام، ما يخليه ولو بـ هدف، إذا كان الغرض يعني إزاحة حسام من عرشه.

إنما خليني أعمل معاك حاجة ظريفة جدا، مش بس بـ هدف إثبات صحة الرقم، إنما أهي فرصة نفتكر سوا أهداف الخطيب الـ 109، وظروف كل هدف، على مدار سلسلة من المقالات، ربنا يقدرنا ونكملها، وممكن الرجوع لـ فيديو مجمع عملته لـ الأهداف دي على يوتيوب، والله المستعان:

الهدف الأول كان في أول ماتش يلعبه الخطيب مع الأهلي، لأ، في أول 7 دقايق، كنا ساعتها في موسم 1972-1973، وكان الخطيب وقتها عنده 18 سنة إلا أسبوعين بـ الظبط، كنا في الجولة التانية، وكان الأهلي بـ يلاعب البلاستيك، يوم 15 أكتوبر 1972، والخطيب ما بدأش الماتش كـ لاعب أساسي، كان في البدلاء.

الشوط الأول انتهى 2/صفر لـ الأهلي، وحسب تعليق نجيب المستكاوي في تغطية المباراة تاني يوم لـ الأهرام: "في بداية الشوط الثاني أحسست أن أنوف فريق البلاستيك ترتفع، وعرفت السبب، لقد اشتموا رائحة خطر، وفعلا وجدت أن محمود الخطيب لعب محل عادل الجمال".
بعد 7 دقايق من نزول بيبو الماتش، سجل الهدف التالت لـ الأهلي من تسديدة بعد مراوغة، وكان الحارس اللي تلقى أول أهداف الخطيب في الدوري هو مجدي الشيخ.
الهدف التاني كان في آخر ماتش من نفس الموسم، كان الأهلي خلاص خسر الدوري، اللي فاز بيه غزل المحلة، وكان ماتش قصاد النادي المصري، فـ يعني تحصيل حاصل، ومش فارق في أي حاجة، الخطيب يوميها سجل هدف بعد 20 دقيقة من بداية الماتش، وفاز بيه الأهلي واحد صفر، وانتهى الموسم الأول لـ الخطيب بـ هدفين.
خلينا الفترة الجاية نستمر مع الأهداف دي، لـ إنه فيها ذكريات كتير حلوة، على الأقل بـ النسبة لي.