6-0 ولا 6-1؟

أصدقاء بعتوا لي، طلبوا مني أحسم الجدل حوالين موضوع لقاءات القمة، وأكبر فوز فيها: هل هو 6/1 ولا حتى 6/صفر؟
أشكرهم على الثقة، لكن: هو أساسا مفيش أي جدل في الدنيا بـ يتحسم، لا في الكورة ولا في غيرها، لـ إنه عادة الناس بـ تصدق اللي هي عايزه تصدقه، ولما ييجي حد يقول لها ما يدعمه، حتى لو كان واهي، ويفتقد لـ المنطق، برضه بـ يحبوا يصدقوه، فـ بـ يفضل.
ثم إنه لو فيه حد هـ يحسم، أكيد مش أنا، ولا أي حد زيي، إنما المفروض اللي يعمل دا اتحاد الكورة، الجهة الرسمية المنظمة لـ المسابقات اللي بـ يلتقي فيها الأهلي والزمالك، أو الكاف إن كان عنده حاجة، لكن زي ما إحنا عارفين، الجهات آخر ما يعنيها هو التوثيق الرسمي لـ ما جرى، يا راجل، إحنا ما عندناش ملفات عشر سنين فاتوا حتى، فـ الموضوع هـ يفضل معلق. 
إنما دا يمنعش برضه، إني أقول لـ حضرتك ما أعلمه عن ذلك الموضوع، من خلال بحثي في الأرشيف، وذلك في ست نقاط:
1. في بطولة الدوري العام، اللي انطلقت 1948، نمتلك سجلات كاملة لـ النتايج، صحيح مش في اتحاد الكورة، لكني أقدر أقول لـ حضرتك إني جمعت الـ12 ألف ماتش (وأكتر) اللي اتلعبوا، وبـ ثقة كاملة أقول لك:
لم يحدث مطلقا مطلقا إنه الزمالك سجل في الأهلي أكتر من 3 أهداف في أي لقاء، بل إنه كمان مفيش 3/صفر، أكبر نتيجة حصلت هي 3/1، بينما زي ما إحنا عارفين الأهلي له 6/1، وهي أكبر نتيجة بين القطبين في المسابقة الأعرق.
2. مش بس في بطولة الدوري، لكن كمان منذ انطلاق المسابقة في 1948، لم يتجاوز الأمر ما ذكرته لـ حضرتك، سواء في كاس مصر، أو أي بطولة أخرى زي السوبر الإفريقي، ودوري أبطال إفريقيا.
3. طيب قبل 1948؟قبل 1948 كان فيه بطولات زي كاس فاروق (كاس مصر) دوري القاهرة، كاس السلطنة، وفي حدود علمي محدش على وجه البسيطة، يمتلك سجلا كاملا لـ البطولات دي، لا رسمي ولا حتى اجتهاد شخصي لـ الباحثين، إنما هناك لقاءات نعثر عليها دون نظام.
4. هنا عندنا تلات لقاءات مؤكدين، مؤكدين يعني عندنا ليهم وثائق تثبتهم، انتهوا 6/صفر، اتنين لـ صالح الزمالك، وواحدة لـ صالح الأهلي: الزمالك 1942، و1944، الأهلي 1926، ومالناش علاقة هنا بـ أي ظروف خارج الملعب، هذا ما حدث في المستطيل الأخضر، إضافة إلى لقاء رابع انتهى 6/4 لـ صالح الأهلي
(اكتشفته السنة دي بـ الصدفة، هو مش "أكبر نتيجة"، لكنه ضمن السداسيات)
5. هل 6/صفر دي أكبر نتيجة؟
الله أعلم، ممكن يكون فيه لقاءات أخرى لم نعثر عليها بعد، لـ صالح دا أو صالح دوكهه، وربما مفيش
6. إذن الجواب: أكبر نتيجة لـ الديربي في الدوري، محسوم إنها 6/1 لـ الأهلي، لا ينتطح فيها عنزتان. بينما أكبر نتيجة "معروفة" سواء في الدوري أو غيره 6/صفر، حققها الزمالك مرتين والأهلي مرة، والله أعلى وأعلم