تامر حسنى لطلاب الإسكندرية: «كل واحد فيكم بطل»
علق الفنان تامر حسني على مقطع الفيديو الذي أطلقه عدد من طلاب المدارس بالإسكندرية، أعربوا خلاله عن حبهم له واعتباره قدوتهم في الحياة، حيث قرر حسني أن يرد عليهم من خلال مقطع فيديو عبر صفحته على موقع إنستجرام.
ونشر حسني مقطع فيديو وعلق عليه قائلًا: "طلاب وأساتذة الثانوية العامة الإسكندرية مش عارف أقولكوا قد إيه فرحت بكلامكو وباللي شوفته في الفيديو من محبة صادقة وتأثير صادق وحقيقي بينا.. شكرًا لكل طالب حس بكلمة إيجابية مني وأثرت فيا سواء في كلامي أو أفلامي أو أغانيا.. شكرًا لكل مدرس حط رسايلي الصادقة ليكم في عين الاعتبار وخاطبكم بها" .
وتابع: "حمدًا لله إن علاقتنا مش مجرد فنان وجمهور لا دي أكبر من كدا بكتير ودي العلاقة اللي حلمت بيها من صغري، بقدر الإمكان بخرجلكم من رحلتي كل ماهو إيجابي ليكم من نصيحة أخ إلى كلمة تحفيزية واللي جاي مني ليكم أكتر وأحلى بإذن الله".
وأكمل: "كل واحد فيكم لازم يبقى بطل في قصة حياته عشان كدا متزعلوش من أي صعب وأي أخطاء وأي فشل في أي اتجاه الحياة رحلة ومشوار طويل مش موقف ولا موقفين، والحل الوحيد إننا ننجح ونعتمد على نفسنا وتتعلموا إنكم متسندوش على أشخاص عشان لو مشيوا متقعوش، اسندوا على إيمانكم بربنا أولًا وتاني حاجة اسندوا على حلمكم".
عبر مجموعة من طلاب الثانوية العامة في إحدى المدارس بمدينة الإسكندرية عن إعجابهم بالنجم تامر حسني ووصفوه بقدوتهم في الحياة من خلال فيديو دشنوه واستعانوا فيه بأغانيه المحفزة على طريقة "خليك فولاذى"، "أنت استثنائى".
