حاتم صلاح يشكر أسرة مسلسل «الكبير أوي 6» على فرصة المشاركة بالعمل

وجه الفنان حاتم صلاح والذي يلعب شخصية نفادي ضمن أحداث مسلسل الكبير أوي والتي حققت نجاحًا كبيرًا منذ انطلاق حلقات المسلسل الأولى، الشكر لفريق عمل مسلسل الكبير أوي الجزء السادس عبر صفحته الرسمية على موقع التواصل الاجتماعي فيس بوك وعلق قائلًا: "الكبير أوي 6.. بقعد اتفرج عليها لحد قبل رمضان بتفرج على الخمس أجزاء ومش بصدق إني هيجي رمضان وأقف وسط الممثلين العِظام دول كوميديانات مصر اللي كتبوا تاريخ في الكوميديا.. أولًا فضل ونعمة من ربنا كبير أنا والله ماليا يد فيه بدون حول مني ولاقوة لو في حد حب المسلسل أولًا وحب شخصية نفادي، ثانيًا بشكر كل الناس اللي فرحتلي كأني واحد من عيلتهم وبشكر أصحابي فرقة 1980 وأنت طالع وكنا بنسهر على القهوة بالساعات عشان نروح نقول إيفيه وبشكر أحمد الجندي اللي خلاني أقول كل اللي في نفسي ويزودلي عليه وأي ممثل كوميدي حظه وحش لو ما بيشتغلش معاه وبشكر كل فريق الإخراج محمد خيري اللي كان معايا من أول أوديشن لحد النهاردة وأصحابي واخواتي كل كرو الإخراج حسني وأحمد ونور ومحمد بيومي  ومحمد علاء وصالح وحسين وعم حسن قناوي مصحح اللهجة.

وأردف قائلًا: “أنا كنت بحس إني سعيد أول ما أدخل اللوكيشن وكل فريق الإنتاج بقيادة شادي علام وحاتم سعيد وعمرو عاصم مونتير المسلسل اللي كلمني مكالمة أنا مش هنساها طول حياتي.. حقيقي أنا كنت مستريح أوي وحاولت اطلع كل اللي عندي يارب يكمل نجاح المسلسل على خير ونكون قدرنا وبنقدر نرسم الضحكة على وشوش الناس اللي بتتفرج  أحمد مكي الكبير أوي في كل حاجة مهما قلت والله ما عارف أعبر ولا اطلع ربع اللي جوايا تجاه الناس دي”. 

ووجه حاتم صلاح شكر خاص للنجم أحمد أمين قائلًا: “مينفعش اتكلم عن كل الناس الحلوة وماتكلمش عن اخويا وصاحبي الفنان الكبير أحمد أمين اللي قدمني للناس هو وعلاء إسماعيل في برنامج أمين وشركاه  ووقف جنبي ولحد يومنا هذا جمايله مغرقاني كأني واحد من عيلته وفرقتي فرقة 1980 وانت طالع وجمهور 1980 وانت طالع.. أنا مش عارف اتكلم وملغبط بس بحبكوااا أوي.. اللهم ديمها نعمة”. 

يذكر أن مسلسل الكبير أوي الجزء السادس يقوم ببطولته النجم أحمد مكي ورحمة أحمد فرج وبيومي فؤاد وحاتم صلاح ومحمد سلام وهشام إسماعيل وعدد كبير من النجوم ومن إخراج أحمد الجندي.