«محامية» تحقق حلمها بـ«تورت الموالح»: «أولادي وزوجي الداعم الحقيقي لي»
استطاعت داليا عباس، محامية، أن تحقق حلمها بعمل مشروع «تورت وساليزونات وموالح وفيميه وسي فود» حيث تبيع «أون لاين».
وتقول «داليا» إنها بدأت مشروعها بعمل «تورت الموالح» لأصحابها ومعارفها حتى أصبحت مميزة بها، قائلة:« وبتعجب كل الأعمار وكل الأذواق وبدأت الطلبات منهم بشكل متكرر بإني أعملها والحمد لله بدأت أعملهم فعلا وأعرضها للناس واللي خلاني الحمد لله بطلع بشكل يومي كذا أوردر في وقت بسيط جدا أولا أسعاري كويسة مش هدف الربح قد هدف الانتشار والناس تجربها».
وأضافت أن تورت الموالح شيء جديد غير منتشر ولا يوجد عليها إهتمام كبير لذلك المنافسين لها قليلون، وحول بدايتها للمشروع تقول داليا عباس :«الحمد لله وبفضله بدأت مشروعى من حوالي ٥ شهور بس وبرغم المدة القصيرة دي أنا بفضل الله وكرمه بعمل أوردرين أو 3 في اليوم واللي بيساعدني أولادي بشكل غير مباشر بأنهم يعتمدوا على نفسهم فالوقت اللي بكون فيه مشغوله ودي حاجة بالنسبالي جميلة وطبعا الدعم النفسي من جانب زوجي برغم اعتراضه في الأول على الفكرة ولما شاف نجاحي الحمد لله اقتنع بيا وبقي الداعم والسند الحقيقي لي».
وحول تنسيق عملها كمحامية مع تحقيق حلمها قالت: «الحمد لله برتب المواعيد المناسبة ليا لاستلام الأوردر أو الطلب وهو الحجز لازم قبلها بيوم لأن الحاجة لازم تكون فريش ليها معاملة معينة والحمد لله الناس جميلة اللي بتعامل معاها وبالنسبه لحلمي أنا مؤمنة جدا إن ربنا لما بيحب يكرم حد بيكرمه دون حساب وربنا مسهلي كل حاجه وبلاقي الناس نفسها بتشجعني أكمل حلمي».
واختتمت: «بحلم إني أعمل فروع في جميع المحافظات لأني بعتذر لناس كتير أوي فالمحافظات خارج الجيزة والقاهرة».
