أحمد حسن بعد حرق سيارته: «اقفوا جنبي.. أنا عايز حقي»

كتب اليوتيوبر أحمد حسن، عبر حسابه الرسمي بموقع التواصل الاجتماعي "إنستجرام ": "الحمد لله على كل شئ".

أضاف حسن، "أولًا أنا مش زعلان من اللى حصل لانوا فى الأول والآخر قضاء وقدر وبحمد ربنا إنى خرجت من العربية، أنا ومراتى وبنتى سالمين غانمين لأنى كل ما بشوف منظر العربية بعد ما اتحرقت واتخيل إن إحنا لو كنا جوّاها وملحقناش نخرج منها قبل متتحرق كان هيحصل لنا إيه قلبى بيوجعنى جدًا".

وبدأ أحمد حسن يحكي لجمهوره: "اللى حصل بالظبط كالتالى كنت راكب العربية أنا وزوجتى وبنتى ورايحين مشوار بالليل فجأة وبدون أي مقدمات العربية تطلع دخان وعربية ماشية جنبنا تنبهنا بده فروحنا نازلين بسرعة من العربية وبعدت مراتى وبنتى بعيد عن العربية وفجاه قبل ماوصل للعربيه تانى عشان اجيب متعلقاتنا الموجوده فى العربيه الاقيها بتولع حاولنا نطفيها كتير لكن كل مكنا بنحاول نطفيها بالطفيات بتاعت الحريق النار كانت بتزيد اكتر لحد ما العربيه تفحمت بالكامل مع العلم ان العربيه لسه مشتريها من ٥ شهور بس وموديل ٢٠٢٠ وماشيه ١٠ آلاف كيلو بس ومش من شركة أي كلام.. دى عربيه مرسيدس cla 200 وتولع بينا وإحنا ماشيين فى الطريق انتوا متخيلين الشركات دى بتستهر بأروحنا إزاى رغم إنهم بيدّعوا انهم بيحافظوا عليها بوسائل الأمان اللى بتكون فى العربيه ومع العلم ايضا انى وصلتنى رسايل كتير من كذا شخص استخدم نفس الموديل ده من مرسيدس وحصلت معاه نفس المشكله بالظبط انتوا ازاى بتلعبوا بأرواحنا كده؟"

وواصل اليوتيوبر حديثه: "بعد مشوفت ان العربيه ضاعت منى خلاص وبقالها اكتر من نص ساعه النار مشتعله فيها وبعد متوصلنا مع المطافى وقالوا انهم فى الطريق حاولنا كتير اننا نطفى العربيه وكانت بتزيد اكتر والنار بتكون اشد قررت اطلع لايف واوثق اللى بيحصل ده وان ازاى شركه بحجم مرسيدس تكون بتستهر بارواح عملائها بالشكل ده وده اللايف اللى شوفتوه.

وتابع "دلوقتى أنا عايز حقى أنا واحد طلع عينى سنين وحرمت نفسى من حاجات كتير عشان اشترى العربيه دى وبعد مجبها متكملش معايا ١٠ آلاف كيلو وتولع لوحدها فيبقا لازم اطالب بحقى وفى ناس كتير بتبعتلى بتقولى انت زعلان ليه دى مجرد عربيه لا حضرتك لازم أزعل لأن دى بالنسبالى مش مجرد عربيه دى حلم وتعبت كتير عشان احققه وبعد محققته راح منى بسبب شركه مستهتره حضرتك لو اشتريت موبيل والشاشه بتاعته طقت لوحدها واتشرخت منك تانى يوم هتكون حزين جدا وهتروح تبهدل الشركه اللى اشتريت منها التليفون مبالك بقا باللى حصل معايا.