فيديو وصور..بسبب 10 جنيهات.. سائق توكتوك يقطع يد زميله بكفر الشيخ
فى منزل متواضع بقرية كفر العجمى، التابعة لمركز بيلا، فى محافظة كفر الشيخ، يجلس السيد محمد البدراوى العزب، فى العقد الخامس من عمره طريح الفراش، نتيجة ما جرى له ليلة عيد الأضحى المبارك، بعدما اعتدى عليه سائق "توكتوك" و2 آخرين بسلاح أبيض.
تعود التفاصيل بحسب رواية المجنى عليه، إلى يوم وقفة عيد الأضحى المبارك، الموافق 10 أغسطس الماضى، بعدما نشب بينه وبين زميله سائق توك توك خلاف على أسبقية التحميل بمنطقة كشك المرور، بنطاق مدينة بيلا.
وقال المجنى عليه، لـ"الدستور"، "الواقعة حدثت عند كشك المرور فى مدينة بيلا، كان فيه 2 حريم رايحين كفر الأبحر، التابعة لمركز نبروه، فى محافظة الدقهلية، وهى قريبة من بيلا، وفيه شاب واقف بتوكتوك قالهم رايحين فين مردوش عليه، قولتلهم رايحين فين قالولى رايحين الأبحر، قام الشاب اللى معاه توكتوك نزل يتخانق معايا، وبعدين مردتش عليه، وركبت توكتوكى ومشيت وجري بردو ورايا بالتوكتوك بتاعه، والناس فرقت بينا، ولكن قالى جملة: أنت فاكر أنها كده خلصت".
وأضاف المجنى عليه، "الساعة 9:30 مساء ليلة عيد الأضحى المبارك، الشاب ده تربص ليا هو وأخوه وابن عمه، على طريق بيلا ـ كفر العجمى، وكان معاهم سنجة وخرزانة، وقطعوا عليا الطريق، وكان الطريق فاضى خالص وضلمة، ونزلوا فيا ضرب، قطعوا كف أيدى، وضربونى على كليتى، ومن ساعتها وأنا مركب قسطرة علشان البول انقطع فيا".
وتابع "أن رب أسرة، وعندى ولد وبنتين، والتوكتوك كان أكل عيشى وعيش ولادى لأنى بعول أسرة كاملة، وكمان حماتى مقيمة معانا، مين هيصرف على كوم اللحم ده، بعد ما ايدى اتقطعت، ومصدر دخلى الوحيد راح، والموضوع هيمشى قانونى أنا مش عايز تعويض منهم".
وطالب المجنى عليه، اللواء محمود حسن، مساعد وزير الداخلية ـ مدير أمن كفر الشيخ، بالتنسيق مع اللواء فاضل عمار، مساعد وزير الداخلية ـ مدير أمن الدقهلية، لسرعة القبض على المتهمين فى أقرب وقت ممكن، وتسليمهم للعدالة ـ على حد قوله ـ.
ومن جانبه، أكد محمد حسن المشرفى، محامى المجنى عليه، أنه جرى تحرير المحضر رقم 2831 لسنة 2019م جنح مركز شرطة بيلا، وأن محضر الواقعة أمام النيابة العامة لمباشرة التحقيقات، مع صدور أمر بضبط وإحضار المتهمين، مشيرًا إلى أن القضاء المصرى لا يضيع حق مواطن.
