يوميات رمضان "10"

- بعتذر لكريم عفيفي لإني كنت شايفه ممثل عادي بيهرج في وسط اسكتشات مسرح مصر.. مشهد قتل "قمر" في "ولد الغلابة" مش راضي يطلع من دماغي لحد النهاردة ده ممثل جبار.

- بمناسبة مشهد القتل في "ولد الغلابة".. القتيلة قمر هي ريم سامي أخت المخرج محمد سامي.. وبكده أخت المخرج اتقتلت ومراته "مي عمر" أكلت ضرب ما أخدوش حرامي في مطلع.

- صحيح محمد سامي مخرج موهوب وأعماله بتحقق جماهيرية.. لكن واضح إن عنده مشاكل مع قرايبه فبيشغلهم معاه علشان ينتقم منهم.

- الدنيا ما بتديش الواحد كل حاجة.. عندك المذيعة التونسية عايشة عثمان "عايشة شو" عندها فريق إعداد كويس ومخرج حلو وبرنامج فورماته متماسك وقناة متشافة وسوشيال ميديا بتصرف ونجوم كبار في برنامجها وأي مبلغ يطلبه أي ضيف بياخده على طول.. ورجل أعمال حبها واتجوزها بيدفع وهو مبسوط.. الحاجة الوحيدة اللي ما قدرش يشتريها هو القبول.. ده بتاع ربنا.

- جين الموهبة بيتم توريثه عادي بس لو الأب والأم موهوبين.. عندك مثلا حسين فهمي وميرفت أمين.. الاتنين محدش يشك أبدا انهم من أجمل الممثلين اللي ظهروا.. اتجوزوا وخلفوا بنت ورثوها جين الحلاوة.. طبيعي ومنطقي.

عندك كمان كرم مطاوع وسهير المرشدي.. الاثنين غيلان تمثيل فطبيعي ومنطقي لما يتجوزوا يخلفوا غول صغير.. وطبيعي الغول ده يكبر ويبقى الوحش اللي بتشوفوه بإسم حنان مطاوع.

- أنا مبسوط بأحمد السقا جدا السنة دي.. أنا اعرف السقا اللي كان بيمثل زمان قبل ما يتصنف كممثل أكشن.. حتى الآن تمثيل السقا من الحاجات المبهجة في رمضان بغض النظر عن قصة أن اللهجة اللي بيقولها مش بتاعة أهل المنيا.

- على فكرة أصحابك اللي بيحبوا الصيف مش هم السبب في ارتفاع درجة الحرارة علشان تهزقهم وتقولهم استريحتم أو منكم لله.. بلاش اوفر.

- يوسف الحسينى عامل برنامج على "نجوم إف أم" اسمه "حروف الجر"، استضاف تامر أمين، وتقريبا تامر كان عنده دور "تنظير" فعاش في الدور شوية وهوب بدأ يتكلم عن شريف مدكور، وقال ما معناه إن شريف بيكيف نفسه على البرامج اللي بيقدمها وان الموضوعات اللي بتهم المرأة ما تحتاجش مذيع "راجل قوى" أو "خشن"، وإنها محتاجه مذيع "ناعم قوى".. علشان الجنس اللطيف، يشعروا أنه منهم.. وإن شريف مدكور في الحقيقة غير اللي بيطلع على الشاشة.

- شريف مدكور رد على تامر أمين رد في التمانيات وقاله "كلامك سم يا أستاذ تامر، وأنا شخصيتي في الحقيقة هي نفسها اللي على الشاشة أنا ما أعرفكش في الحقيقة وأنت عمرك ما شوفتني ولا كان فيه بينا أي تعامل".

- كل اللي اتريق على شريف مدكور رجع واعتذر واتأسف ودعاله إن ربنا يشفيه.. إلا تامر أمين.

- فجر السعيد عملت حوار مع حسني مبارك

- شخصية الحراق هتكون علامة في حياة كريم محمود عبد العزيز

- اللوحات اللي بتظهر في مسلسل زي الشمس طلع معمولها داون لود من الانترنت.. اللوحات الاصلية رسمتها الفنانة التشكيلية هالة الشاروني وأتباعت من فترة.

- أنا على استعداد بالاعتراف أن مي عز الدين ممثلة كويسة بشرط انهم ياخدوا عليها تعهد بعدم التعرض للكوميديا مرة تانية.

- أحمد سعد عنده مشاكل.. وكل ست ارتبطت بيه كانت عارفة المشاكل دي وعارفه أنه بيتعالج وإن لما بتهبأ معاه بيضرب.. ليه بقى الزيطة والخناقات.

- ما فيش أسوأ من الستات اللي ارتبط بيهم سعد غير الستات اللي بتزيط وتتاجر بالخناقات رغم أن حياتهم مش الطف كتير

دعاء اليوم: اللهم عليك بمن ظلم.. ومن ساعد من ظلم ومن سهل الظلم ومن دل عليه ومن أعان ظالما بسكوته.. قولوا امين