"أمهات مصر": تصريحات وزير التعليم "إهانة" وعليه الاعتذار

استنكرت عبير أحمد مؤسس اتحاد أمهات مصر للنهوض بالتعليم، تصريحات الدكتور طارق شوقي وزير التعليم التي قال فيها "أمهات مصر عايشين 24 ساعة علي الفيس بوك، معناه أنهن مش فاضيين لتربية أولادهم".

وأضافت، في بيان صادر عن الاتحاد، أن تصريحات الوزير إهانة وإساءة لا نقبلها، مؤكده أن أمهات مصر يعانون أشد المعاناة من أجل تربية وتعليم أبنائهم ويتواجدون علي الفيس بوك لمتابعة قرارات الوزارة وتحميل مذكرات ومراجعات للأبناء.

وطالبت"أحمد"، وزير التعليم بضبط النفس وعدم الإساءة لأولياء الأمور من الأمهات أو الأساءة لأبنائهم واتهامهم بعدم التربية، مؤكده أن أولياء الأمور شريك أساسي في العملية التعليمية، مشيره إلي أن تصريحات الوزير تعتبر إهانة واضحة لكل أم ويجب تقديم اعتذار لهن، مستطرده: "المفروض يشكرهم علي التعب اللي بيتعبوه مع أبنائهم بدل الإساءة والهجوم عليهم".

وتفاعل أولياء الأمور من الأمهات علي صفحة اتحاد أمهات مصر للنهوض بالتعليم، في الفيس بوك، مهاجمين وزير التعليم علي تصريحاته، حيث قالت ولي أمر: "انت لو تعرف الأمهات بتعانى ازاى فى تربية ومذاكرة الأولاد وظروف كل بيت، حسبى الله ونعم الوكيل، احنا مش زى الستات اللي فى الكوافير والنادى وبتحضر حفلات عمرو دياب"، وتابعت أخري: "اه عندك حق بأماره المواعين والغدا والعشاء والمكوى والدروس والمذاكره والامتحانات، فعلا احنا فاضين عقبالك يارب مايرزقك زى مارزقنا".

وأضافت ولي أمر أخري: "والله حرام بعد كل التعب والمجهود أولياء الأمور والأمهات فاضين بس للفيس بوك، الطالب من غير اهتمام امه مش نافع لأن حضرتك المدرس نفسه بيقول كده"، واستكملت أخري: "وزير التابلت اللى بيشحت عشان يجيب مقاعد وديسكات بيهين ستات مصر اللى مستحملين الفشل والقرارات المصيرية اللى هتضيع أجيال كاملة، بيهين ستات مصر عشان يدارى على أخطائه.. حسبى الله ونعم الوكيل".

وذكرت ولي أمر: "أمهات مصر خط أحمر، لن نقبل منك إهانه، عجزك وفشلك الواضحين خلاك معندكش غير الإهانات"، وأضافت ولي أمر أخري: "قاعدين علي الفيس نتابع تصريحاتك المتضاربة اللي طالعه كل ساعه، هو فيه مسئول بيصرح تصريح كل ٦ ساعات وكل تصريح يضرب اللي قبله، التابلت اول السنه لا التابلت في البحر لا التابلت في نوفمبر لا مافيش تابلت، مين اللي فاضى للتصريحات والمشروعات الفاشله، هو بيهين الأمهات وبيقول علي ولادنا مش متربيين؟".

وقالت ولي أمر أخري: "بعد ما شبع إهانة للمدرسين هيدور على أولياء الأمور وبعد ما كان بيعلق فشل التعليم على المعلم غير الشماعة للأمهات"، وأضافت أخري: "ده أكبر دليل على فشلك وعلى انك خايف مننا ومن الفيس اللي انت بترمي عليه اتهامات ليس له أي أساس من الصحة، وأمهات مصر خط أحمر
واحنا بنربي اولادنا احسن من اي حد في الدنيا، واحنا اكتر ناس متمرطه ما بين مدرسه ودروس وتمارين علشان يبقو احسن ناس ويارب ياااارب يرزقك بنفس اللي عندنا علشان تحس بينا، مش فاهمه ازاي الرئيس السيسي سايبه كده يهين فينا بالرغم انه هو اكتر واحد حاسس بالست المصريه ودايما رافعنا لفوق وعارف ان احنا قد المسؤليه.. لا احنا من الستات اللي ماسكه الفيس 24 ساعه زي ما بتقول
ولا احنا بنروح كوافيرات ونوادي وسايبين اولادنا في مدارس انترناشونال اللي انتم مدخلين فيها اولادكم".

وكان الدكتور طارق شوقي وزير التربية والتعليم قال خلال مؤتمر الأسبوع الأول للتنمية المستدامة الذي تنظمه الأكاديمية العربية للعلوم والتكنولوجيا والنقل البحري، إن "أمهات مصر اللي عايشين 24 ساعة على الفيس، معناه أنهن مش فاضيين لتربية أولادهم"، في إشارة منه إلي جروب اتحاد أمهات مصر للنهوض بالتعليم، الأمر الذي أثار غضب الأمهات.