وليد منصور لمحمد رمضان: "البدلة" علّم عليك.. وشكلك "بلطجي"
نشر المنتج ومنظم الحفلات وليد منصور، بيانًا عبر صفحته الرسمية على "فيس بوك"، يرد فيه على الفنان محمد رمضان، بعدما أرسل الأخير بيانًا للصحفيين يكذب فيه إيرادت فيلم "البدلة"، ويستهزئ من وليد منصور.
وكتب منتج "البدلة" عبر صفحته: "رساله موجهة من المنتج وليد منصور إلى محمد رمضان، وصلني إنك بتبعت رسائل من تليفونك الشخصي تتهمني فيها بتغيير أرقام الإيرادات، مكنش نفسي أرد على شخص زيك رمز للإسفاف علشان مخرج العمل ومنتجه أصدقاء محترمين، بس إنت زودتها قوي يا حمادة".
وأضاف: "أولًا إنت إسمك لازم كل مصر تغيره لمحمد مرضان، لإنك بتفكرني بالمجانين اللي ماشين في الشارع ومش عايزين يصدقوا إنهم مجانين، فارتاح يا حمادة محدش عاقل هيصدقك، عمرك ما كنت رقم ١ في الإيراد، وعمرك ما كنت أحد نجوم الصف الأول وإنت عارف إن السبب إن فنك هابط يا مرضان وملامحك للأسف متعرفش تعمل غير دور المدمن أو البلطجي أو إرهابي أو حرامي، أنا كان نفسي متكلمش عنك لأنك أصلًا بالنسبالي وبالنسبة لكل الشعب الراقي المحترم أكذوبة، وإنت عارف كويس إن أفلامك طول عمرها بتفشل قدام النجوم المحترمة، زي السقا وعز وتامر وأستاذ عادل إمام، نصيحة يا مرضان روح إتمرن تمثيل بدل ما انت أداءك واحد في كل أدوارك".
وتابع "يابني إنت طبعًا هتموت عشان مش عارف تشتري فيوز (مشاهدات) زي أغانيك الهابطة، فمفضوح قوي قدام الغلابة اللي مصدقينك اللي بينقرضوا واحد ورا التاني، يا ولا قسمًا بالله لو لقيتك بتهرتل على أي حد تاني هيكون ردي أعنف من كده، وأصلًا أنا لسه مخلصتش ردي، إنت هتموت من الغيظ عشان البدلة علّم عليك ولسه هنعلم أكتر وإنت عارف هتتمسخر إزاي الفتره اللي جاية، زي ما إتمسخرت فكل أفلامك اللي فاتت".
يذكر أن وليد منصور يشارك في سباق عيد الأضحى بفيلم "البدلة"، بطولة تامر حسني وأكرم حسني وأمينة خليل، ويشارك الفنان محمد رمضان في نفس السباق بفيلم "الديزل"، ويشارك في بطولته فتحي عبد الوهاب وهنا شيحة وياسمين صبري.
