نادى الدهر

الأهلي لعب النهائي الإفريقي 19 مرة قبل كدا، (14) دوري الأبطال، (4) كأس الكئوس، (1) الكونفيدرالية، وهيلعب العشرين قصاد الوداد.
في الـ19 مرة اللي فاتوا، لعب 36 ماتش، كسب 16، اتعادل 12، خسر 8 مرات، سجل 45 هدف، كل اللاعبين اللي سجلوا في ماتشات النهائي لـ الأهلي عددهم 28 لاعب بـ الإضافة لـ هدف ذاتي، سجله التعلب لاعب الهلال السوداني، في نهائي نسخة دوري الأبطال 1987.
أبو تريكة هو الأكثر تسجيلًا: 5 أهداف، في 5 ماتشات، تلات نسخ مختلفة، 2005 قصاد النجم الساحلي، 2006 قصاد الصفاقسي (هدف ذهابًا وهدف إيابًا) 2013 أورلاندو (هدف ذهابًا وهدف إيابًا).
السولية كمان سجل في تلات نسخ، لكن 3 أهداف فقط: 2018 الترجي، 2020 الزمالك (ماتش القاضية ممكن)، 2021 كايزر تشيفز، الظريف إنه كل رصيد السولية قاريًا في كل الأدوار وكل النسخ 5 أهداف فقط لا غير، منهم 3 في النهائي.
مجدي عبدالغني كمان سجل في 3 نسخ، أيون، مجدي عبدالغني، لكن في كأس الكئوس الإفريقية، وهو الوحيداللي سجل في تلات نسخ ورا بعض، والأهلي كسبهم كلهم: 1984 كانون ياوندي، 1985 ليفنتس النيجيري، 1986 سوجارا الجابون.
ثم يتوالي اللاعبون، وكان أول لاعب يسجل لـ الأهلي في النهائي الإفريقي هو محمود الخطيب، اللي سجل تلات أهداف في كوتوكو الغاني 1982، اتنين هنا في مصر، وهدف التعادل في في غانا. يوميها جات الأنباء من كوماسي إنه مصطفى عبده هو اللي سجل الأهداف، لكن لما جه التسجيل (لـ إنه الماتش ما اتذاعش) عرفنا إنه الخطيب، اللي سجل كمان أول ثنائية في النهائي.
الوحيد اللي سجل هاتريك في النهائي هو خالد بيبو، الكلام دا كان في صن داونز 2001، لما كسبنا هنا 3/صفر، بعد التعادل هناك.
الوحيد اللي سجل "القاضية ممكن" هو ولدنا أفشة، رقم 19.
النهائي الوحيد اللي الأهلي حسمه بـ ركلات الترجيح، كأس الكئوس الإفريقية 1984، أما دوري الأبطال فـ ما حصلش نهائيًا، يوم كانون ياوندي دا كان الحارس أحمد شوبير.
أكبر فوز كان 3/صفر، حصل كتير: كوتوكو 1982، سوجارا بطل الجابون 1986، صن داونز 2001، النجم الساحلي 2005، كايزر تشيفز 2021.
الأهلي فاز على ملعب المنافس مرتين، والمرتين في تونس، وعلى نفس الملعب، بس فرقتين غير بعض: 2006 الصفاقسي، بـ هدف أبو تريكة الأشهر، اللي أكيد طبعًا كلنا فاكرينه، و2012 الترجي، ومرة كمان خارج مصر لكن ملعب محايد، كايزر تشيفز 2021.
الأهلي توج من الـ19 بـ 15 لقب، 7 مرات كان التتويج في القاهرة، و8 مرات سافر وعاد بـ الكأس من 6 دول مختلفة: من غانا 1982، من الكاميرون 1984، 2008، من نيجيريا 1985، من الجابون 1986، من تونس 2006، 2012، من المغرب 2021.
تفاصيل كل الماتشات دي، وكل همسة حصلت في أي نهائي، ما زالت عايشة في ذاكرتي كـ إنها إمبارح، 40 سنة من النهائيات، ما فوتتش منهم نهائي واحد، وما شفتش نادي تاني بـ يلعب هذا الكم، ولا حتى قرب منه، الأهلي فعلًا هو نادي الدهر.