عكازك الأحلام
وفى سكة الأحلام
كان م الضرورى تعوم
بمركبة من ورق
والشط كله نجوم
والشاطر اللى ابتدا
يسحب خيوط المدا
لو يوم وقع بيقوم
متهزهوش الريح
ولا يغلبوش الهم
اتعب عشان ترتاح
انزف فى تعبك دم
خليك دهب يتعاز
عكازك الأحلام
أيام ما تبقى جفاف
الفرح جاى قدام
لو قبله سبعة عجاف
زود طموح قدام
كتر أمل فى الجاى
الدنيا تضحك لك
ببيانو غلب الناى
وإن يسألوك إزاى
حققت أحلامك؟
قول أمر مش هين
وأنا كنت قد القول
شىء مُره مش لين
تشهد جروحك دول
على كل ليلة سهر
الكل فيها نيام
والليلة حق وصول
للشاطر اللى ما نام
