منة عرفة توجه رسالة لجمهورها: "غلطتى إنى شاركتكم تفاصيل حياتى"
حالة من الجدل أثيرت عبر مواقع التواصل الاجتماعي «فيسبوك»، بعد إعلان انفصال الفنانة الشابة منة عرفة، والفنان الصاعد محمود المهدي، قبل أن تتردد أنباء عن عودة علاقتهما لطبيعتها مرة أخرى.
وخرجت الفنانة الشابة منة عرفة عن صمتها موجهة نصائح لمتابعيها على السوشيال ميديا.
فكتبت منة عبر استوري صفحتها على «إنستجرام»: «من أصعب اللحظات اللي ممكن تعدي على أي ست لحظة الانفصال وخراب البيت، الطلاق يهتز له عرش الرحمن، لكن أنتم يمكن عشان بتسمعوا عن بيوت بتتخرب كل دقيقة فبقى أبغض الحلال عند الله بالنسبة لكم نكتة أو حاجة تتمسخروا عليها، رهان بتعملوه مع بعض على أننا مش هنكمل، أو مادة خام للشماته فينا، خراب البيت عمره ما كان حاجة سهلة على الست أو على الرجل أو على أهالينا».
وأضافت: «في عز ضعفي وحزني وكسرتي اللي ربنا ما يكتبها على أي ست مرحمتونيش ولا قدرتوا إني في موقف لا أحسد عليه وشمتانين فينا، قد إيه إنتوا ناس متعرفوش ربنا ولا في قلوبكم رحمة، اتمنوا الخير لبعض يا جماعة بلاش نشمت في بعض، لكن دي غلطتي أنا إني شاركتكم حياتي الشخصية، الإنسان بيغلط عشان يتعلم وأنا اتعلمت وربنا يعينكم على نفسيتكم الجحيم دي وعسى أن تكرهوا شي وهو خير لكم».
واختتمت: «يمكن الخلاف اللي حصل كشفلنا ناس كتير حوالينا كانوا بيمثلوا أنهم فرحانين لينا بس الحقيقي أنهم كانوا مستنين أول مشكلة عشان يشمتوا فى كسرتي وخراب بيتي بس والله ربنا مش هينولهلكو وربنا يخليلي أهلي وزوجي والناس اللي بتتمنالي الخير ووقفت جنبي وكلمة أخيرة للسادة الصحفيين أرجوكم كفاية بقى ارحمونا حرام عليكم».
يذكر أن محمود المهدي، كشف من قبل عن زواجه مرتين قبل تجربته مع منة عرفة، حيث كتب عبر موقع التواصل الاجتماعي فيسبوك، قائلًا: «دي الزوجة الثانية الناس اللي قعدت تهاجم إني متجوز 3 مرات وتعدد وكلام كتير، أنت متعرفش حياتي دي وملكش حق تحكم عليا ولا حد قالك ادخل ولا عايز رأيك طبعًا».
وتابع: «البنات اللي بتفرض كلامها بالعافية وكأنها عارفة مصلحتها كنتي نفعتي نفسك طول ما أنا مش بغضب ربنا كده ده اللي يهمني طبعًا والنبي نضفوا السواد اللي بقى في قلبكم».
