الثلاثاء 21 سبتمبر 2021
رئيس مجلسى الإدارة والتحرير
د. محمد الباز
رئيس التحرير
وائل لطفى
رئيس مجلسى الإدارة والتحرير
د. محمد الباز
رئيس التحرير
وائل لطفى

أول بطولة فى مصر

سنة 1913، في هذا الوقت المبكر من القرن العشرين، بدأت أول مسابقة أو بطولة لـ كرة القدم في بر مصر، يعني إحنا هنا نعرف المنافسات الكروية على نطاق رسمي من 108 سنة، ودا شيء يدعو لـ الفخر والإعجاب في الواقع. كما أنه يدعو لـ الحزن والأسى في الوقت نفسه.
صحيح أول مسابقة دي وراها حاجات كتير تتقال، إنما في النهاية، إحنا بـ ننظم مسابقات من هذا العمر المديد، كان المفروض والله نبقى في مستوى أفضل كتير من اللي إحنا فيه، يالا، ما علينا.
هذه البطولة بـ الطبع نظمها الاتحاد المختلط اللي اتكلمنا عنه المقال اللي فات، وعشان كان فيه مشكلات من جهات عديدة تجاه هذا الكيان، فيه ناس كتير ما اشتركتش، خصوصًا النادي الأهلي، اللي كان بـ يسعى طول الوقت، لـ إيجاد بديل عن هذا الاتحاد.
البطولة طبعًا كانت كاس، بس مش مؤكد إذا كان له فعلًا "كاس"، من الناحية المادية يعني، ولا لأ، بس المؤكد إنه كان ميداليات بـ تتوزع ع الفريق الفايز، مرسوم على وش منها الإسكندر الأكبر (مش عارف ليه) وعلى الوش التاني تاريخ البطولة.
إنما ما كانش ليها فايز واحد، لـ إنه كان فيه صعوبة لـ الانتقال بين المحافظات، بـ نتكلم عن سنة 13، لما كان المرواح من العجوزة لـ ميدان التحرير سفر، المفروض تعمل استعداداتك له قبلها بـ فترة، فـ فكرة إنه فريق يروح إسكندرية ويرجع، دا كان موضوع كبير مش سهل. 
كانت المنافسات بين أندية القاهرة لـ وحدها وأندية الإسكندرية لـ وحدها، ويبقى فيه فايز هنا وفايز هناك، اللي هو يعني تقدر تعتبرهم بطولتين مش بطولة واحدة، إنما لـ إنه ما كانش فيه توثيق ولا تأريخ، ولا حد كان متخيل إنه الأمور هـ توصل لـ اللي وصلنا له، فـ ما كانش فيه تفكير في مثل هذه الأمور، هي دي كدا بطولة واحدة ولا اتنين، نسختين ولا نسخة، كويس أوي إنهم لعبوا.
طبعًا، كل الأندية اللي شاركت كانت أجنبية قلبًا وقالبًا، أساسًا ما عندناش قايمة بـ أسماء الأندية اللي كانت موجودة وقتها، لكن اقتصارها على الأجانب كان مؤكد، فيه بـ يقول إنه كان مشاركة مصرية، من خلال نادي السكة الحديد، إنما المؤكد إنه حتى هذا التاريخ، كان لسه النادي اسمه "الهوكي" بـ بولاق، وكان لسه قاصر على الأجانب.
كانت البطولة دي أو المسابقة بـ تتلعب في أشهر الخريف فقط، اللي هو أفضل جو في مصر لـ لعب الكورة، الماتشات تتوزع على أشهر أكتوبر ونوفمبر وديسمبر، اللي بـ يتلعب فيه النهائي، أو الاتنين نهائي، زي ما حضرتك تشوف، لكن بقية السنة مفيش ماتشات.
أول نسخة خالص، اللي كانت سنة 1913، فاز بيها عن القاهرة نادي الهوكي بـ بولاق (السكة الحديد بعدين)، وفاز بيها عن إسكندرية نادي سافواي.
طبعًا، تنظيم بطولة من الاتحاد المختلط، شارك فيها الأجانب، هـ يخلي المصريين يفكروا في بطولة تخصهم، أو خلينا نقول يشاركوا فيها، طيب إذا مفيش "اتحاد" أو هيئة أو مؤسسة تنظم بطولة زي دي، مين ينظمها؟
ودا سؤال! هو فيه غيره؟!
خلينا نشوفه في مقال جي.