رئيس مجلسى الإدارة والتحرير
د. محمد الباز
رئيس التحرير التنفيذي
محمد العسيري
الأحد 11 أبريل 2021 الموافق 29 شعبان 1442
رئيس مجلسى الإدارة والتحرير
د. محمد الباز
رئيس التحرير التنفيذي
محمد العسيري
مؤمن المحمدي
مؤمن المحمدي

جيل ورا جيل

الأحد 07/مارس/2021 - 03:58 م
طباعة
إزاي وليه، "جيل" الخطيب وحسن شحاتة وفاروق جعفرمالوش إنجازات خالص، رغم إنه شهد لاعيبة أفذاذ؟
الواقع، إجابة السؤال دا  ليها كذا شق، أولها كلمة "جيل" نفسها، أنا عندي تحفظ كبير كبير كبيرعلى الكلمة دي نفسها، وبـ أفضل عليها كلمة "الفترة"، مفيش حاجة اسمها "جيل".
الكلمة دي بـ تدي إيحاء كدا، بـ مجموعة من اللاعبين، بـ يظهروا في نفس "الفترة"، ويبطلوا في نفس الفترة، بـ التقريب طبعا، ويشكلوا قوام فريق ما، ودي حاجة، بـ أشوف إنها ما حصلتش في التاريخ، وصعب تحصل.
التاريخ يا أصدقائي من السيولة بـ حيث ما تقدرش أبدا، تقفش مجموعة لاعبين، تزاملوا وتزامنوا مع بعض، ممكن دا يحصل مثلا، مع اتنين لاعبين سوا، لكن أكتر من كدا صعب، بـ غض البصر بقى، عن تسمية "الجيل" بـ اسم حد أو لأ.
خليني أوضح لك الفكرة أكتر، إحنا مثلا بـ نقول: جيل أبو تريكة، أو ناس تقول عليه جيل حسن شحاتة، أو جيل بركات، أو جيل الجن الأزرق، مش دي الفكرة، الفكرة إنه ما كانش فيه "جيل"، إنما كان فيه فترة نقدر نحددها بـ خمس سنين من 2005 – 2010.
الفترة دي اتسمت بـ نتايج ممتازة، وانتصارات تاريخية، وتحسن التصنيف لـ درجة غير مسبوقة، دا لـ المنتخب المصري ولـ الأهلي.
تمام، لكن دا لا يعني إنه اللي لعبوا الفترة دي، شكلوا مع بعض "جيل" ما، هي الفترة نفسها، الكورة كانت مزدهرة، ودا ليه علاقة بـ حاجات كتير أوي، وظروف أكتر، آخرها اللاعيبة اللي لعبت نفسهم.
يعني، تخيل حضرتك مثلا، إننا كسبنا 3 بطولات "كان"، لعبنا في كل نسخة بـ قايمة فيها 23 لاعب طبعا، عارف حضرتك كام لاعب شارك في التلات نسخ؟
"شارك" دي يعني كان في القايمة، بـ غض البصر لعب ولا لأ، بـ الظبط بـ الظبط 6 لاعبين، غير كدا، اللي لعب نسخة، واللي لعب نسختين.
اللي لعبوا نسختين دول، فيه منهم 2006 و2008، وفيه منهم 2008 و2010. فيه 2006 و2010، واللي لعب نسخة واحدة، فيه منهم كان في 2006، ومنهم في 2008، ومنهم 2010.
المقصود إنه كمية التغييرات في الفريق، كانت أكبر بـ كتير، من محاولة إيجاد "جيل".
قد يقول قائل طب ما 6 لاعبين دول، عدد كافي لـ اعتبار هؤلاء اللاعبين قوام، وبـ يتبني عليه، فـ تيجي تشوف الـ 6 لاعبين دول منين، تلاقي 4 منهم الحضري وأحمد حسن ووائل جمعة وأحمد فتحي، اللي هم لاعبين عابرين لـ الفترات.
نوعية كدابـ تطول في الملاعب، وتفضل أساسية طول مشوارها، وتعاصر فترات مختلفة خالص، وظروف متباينة.
أحمد حسن دا كان نجم 1998، يعني قبل 2005 بـ سبع سنين، والحضري بـ يلعب من 1996، ووائل جمعة وأحمد فتحي 2001، وكلهم كانوا قبل الفترة المذكورة، وكلهم استمروا بعدها.
والحضري وأحمد فتحي لعبوا كاس عالم 2018، والحضري صد فيه بنالتي، وفتحي سجل هدفا، صحيح فينا إنما أهو سجل.
زيهم كدا زي حسام حسن مثلا، اللي هو لعب مع الخطيب ومصطفى عبده وشريف عبد المنعم وكان أساسي وبـ يسجل، ولعب مع عماد متعب وحسن مصطفى وأسامة حسني، مع إنه لما الخطيب اعتزل، كان متعب لسه في اللفة.
مفيش لاعيبة تقدر تقول إنهم ولاد "الفترة الذهبية"، أو إنهم شكلوا عمادها. جدو كان هو البرينجي 2010، ودا كان أول ظهور ليه، عمرو زكي بطل اللقطة التاريخية 2006، ما كانش موجود في 2010.
معظم اللاعبين عموما فيهم اللي بدأ قبل الفترة، وفيه اللي كمل، وعاصر فترات تانية.
نفس الكلام ينطبق عن أي فترة، لـ أي منتخب أو نادي.
مين اللي قال إنه الخطيب وحسن شحاتة وفاروق جعفرولاد "جيل" واحد؟ آي نعم جه وقت ماكان التلاتة بـ يلعبوا، بس هذا الوقت كان محدود جدا، المعلم أكبر من بيبو بـ 7 سنين، فـ عز عزه كان في 1974، لما كان الخطيب يعتبر ناشئ، ولسه ما راحش المنتخب.
ولما الخطيب بقى الخطيب، كان حسن بـ يشطب، وبـ يلعب في الدوري بـ الخبرة.
كمان غير الخطيب وحسن شحاتة، مين تقدر تقول عليهم "هذا الجيل"، الوقت اللي كان فيه طه بصري ما كانش فيه مختار مختار، والوقت اللي كان فيه طاهر أبو زيد ما كانش فيه علي خليل، محسن صالح وأنور سلامة ليهم سنين، بدر حامد وعادل عبد الواحد ليهم سنين تانية خالص. حسن حمدي غير إبراهيم يوسف.
كل هذه الأسماء زاملت الخطيب وحسن شحاتة في "فترات"، وكلهم بـ يتقالواعلى أساس إنهم "جيل واحد"، ودا مش صحيح.
كل موسم، كل موسم بـ معنى كل موسم، الفرق بـ تتغير، ودا في آخره ودا لسه بـ يبدأ، ودا مصاب، ودا مش في مستواه، ودا المدير الفني مش بـ يحبه، ودا عنده مشاكل مع فرقته، زي ما فترة كدا فاروق جعفر هرب وراح أمريكا، هو وأسامة خليل، أو لما صبري المنياوي هرب الخليج.
مفيش حاجة اسمها "جيل"، دي بس محاولة تقريبية إجرائية، عشان نلاقي حاجة ممسوكة، نوصف بيها فترة ما.
كويس، السؤال إذن: لماذا غابت الإنجازات عن فترة السبعينيات، رغم إنه بـ شكل عام فيه لاعيبة كتير مميزة، لعبت في هذه الفترة، بـ غض البصرإن كانوا يشكلوا جيل مع بعض أم لا؟
دا بقى موضوع تاني خالص، يستحق مقال منفصل.