محمد المعتصم يكتب: يوميات رمضان (18)

• حلقة رامز جلال اليوم مع ماجي ابو غصن برعاية الخليل كوميدي.
• السؤال الأهم الذي خرجت به من حلقة اليوم: هو رامز جلال كان ماسك في ايه لما ماجب ابو غصن كانت في المركب ؟
• اعلان مصر للطيران باعتبارها الناقل الرسمي لبطولة الأمم الأفريقية اعلان حلو.. اول مرة تعمل اعلان بالشياكة دي.
• اختيار الفنانة درة لبطولة اعلان "تلاجة" اختيار موفق جدا .
• بمناسبة الحر النهاردة الفضائية المصرية كانت عاملة فقرة عن الصن بلوك في الصيف والقناة الاولي كانت عاملة فقرة عن التاتو
• ايمي سمير غانم كل حلقة من سوبر ميرو وزنها بيزيد لدرجة اني خايف في الحلقة الاخيرة تطلع بشخصية خالتك الحاجة ام سوبر
• برنامج الشيف ومفيدة من البرامج الحلوة اللي معلمة مع الناس بس واضح ان مفيدة شيحة بتتعلم القلش جديد، النهاردة كانت بتقول للشيف شربيني : "انا بحب ادي دروس" فالشيف شربيني رد عليها :" انا دروسي بتوجعني " .. على أساس بيردها يعني
• الشيف علاء الشربيني كان عامل فقرة جامدة في لبنان.. الفقرة حلوة جوعتني ، رجع منها يتكلم عن أهمية السفر " لانك لازم تعرف الاكل وصل لحد فين " هيوصل لحد فين يا علاء انت محسسني انك رايح تتعرف على مختبرات ناسا .. دي شوربة يا لينا ترمي الفرخة في المية تبقى شوربة
• النهاردة كان العرض الخاص لفيلم A Score to Settle للنجم العالمي نيكولاس كيدج واللي بيشارك فيه الممثل المصري محمد كريم .. العرض تم في مهرجان كان .. وده معناه ان محمد كريم اتصور حبة صور حلوين يكيدنا بيهم سنتين قدام على انستجرام
• بعيدا عن محمد كريم وصوره فعندنا مشاركة بجد في مهرجان كان السينمائي من خلال المنشد عبد الله المنياوي اللي بيقوم ببطولة الفيلم التونسى "طلامس".. المنياوي مطرب ومنشد صوفى وشاعر وعازف ترومبيت ، عاش في باريس و بيقدم الموسيقى البديلة وله مشاركات كبيرة في مهرجانات الموسيقيى العالمية بين العالم العربى وأوروبا .
• في يومين مصر عندها الممثل العالمي مينا مسعود اللي بيشارك ويل سميث في فيلم على بابا وعبدالله المنياوي اللي بيشارك في مهرجان كان والاتنين رفعوا راس مصر .. ده غير طبعا محمد كريم اللي بيشارك نيكولاس كيدج فيلمه الجديد علشان يخنق علينا بصوره .
• مشهد وداع الدكتور ربيع" الفنان عبد الرحمن أبو زهره لابنه " هيثم أحمد زكي" في مسلسل "علامة استفهام" مؤثر لغاية .. بعد انتهاء المشهد تذكرت مشهد المواجهة بين عبد الرحمن ابو زهرة ويحيي ابو دبورة في فيلم أرض الخوف .. صحيح هناك فارق بين زكي الاب والابن، لكن موهبة الابن واضحة
• سمية الخشاب طرحت دعاء ديني اسمه "صلوا عليه " وده أول عمل لها بعد تكريمها في السعودية
• صفحات الفنان محمد رمضان على السوشيال ميديا تحولت الي مهرجان للاحتفال بعيد ميلاده و معظم العاملين في الوسط الفني شاركوا في الاحتفال ما عدا كام واحد واضحين في كراهيتهم له .. من كام سنة كان عيد ميلاد محمد سعد مناسبة عظيمة لناس كتير .. السنة دي يادوب بيفتكرها اللي بيشتغل معاه .. الخلاصة ان لناس بتهتم بعيد ميلادك وعيد ميلاد الولاد طول ما انت على القمة.. أتمني الرسالة تكون وصلت
• أخيرا محمد رمضان كشر عن أنيابه وطلع الشبح اللي جواه ودغدغ البلطجي ورده في موقف الميكروباص.. الشيء الوحيد اللي توقفت قدامه هو اعلان اتصالات اللي بيشارك فيه رمضان .. هل منطقي انك تضرب فان دام في الاعلان وارجع الاقيك بتتشطر على " ورده" في المسلسل انا خايف يطلع م التليفزيون يدغدغ القهوة اللي قاعدين عليها
• الوحيد الذي لم يحتفل بعيد ميلاد محمد رمضان هو محمد رمضان نفسه.. تقريبا مستني يرجع ال٣٠٠ متر اللي أحدهم منه ماجد المصري علشان الفرحة تبقى فرحتين
• هل هي مصادفة أن يكون اهم مشهد في مسلسل " فكرة بمليون جنية" هو اللي غنت فيه صابرين " أنا الفرخة واحنا الكتاكيت" أن أن الأمر مقصود بأن نترحم على مشهد" الفرخة" الذي جاي بعده كثير من مشاهد " البيض"
• بالصدفة اكتشفت ان برنامج ورطة انسانية موجود وبيتعرض .. لما يبقى برنامج حلو زي كدة وتكتشف بالصدفة انه موجود وبيتعرض والنهاردة الحلقة ال18 منه يبقى كده مش صح .. مش صح خالص
• خبر اليوم: مع ارتفاع درجة الحرارة ..تعرف على ملامح يوم القيامة
( بوابة أخبار اليوم )
• أقوال مأثورة : فيه لجان إلكترونية مخصوص كل سنة بتنزل عشان خاطر صابرين "الفنانة صابرين لبرنامج " شيخ الحارة"
• دعاء اليوم: اللهم اجعل صيام هذا اليوم في ميزان أعمالنا