يوميات رمضان (14)

- عزيزي حسن الرداد.. لا يكفي أن تتزوج ابنة سمير غانم لتقدم كوميدي وايفيهات
- نصيحة لوجه الله لدنيا سمير غانم وشقيقتها ايمي سمير غانم.. يبدو أننا نعرف قيمة وقامة سمير غانم أكثر منكم.. من فضلك منك لها..الاصرار على حشر النجم الكبير سمير غانم في أعمالكم أضره بشده.. للأسف هناك أجيال لا تعرف شيئا عم ملك الكوميديا الذي كان يضحك " كراسي المسرح " يوميا بايفيهات متجددة.. كثيرون لم يشاهدوه وهو يصول ويجول في الدراما والافلام والمسارح العربية يعرض عليها أعماله.. لا تجعلوا الاجيال الجديدة تتعرف على نسخة غير واقعية من ممثل عظيم اسمه سمير غانم
- للاسف تجاهل عدد كبير من وسائل الاعلام لمباراة الزمالك في نهائي الكونفدرالية أمر مؤسف.. ومن المخجل ان يتخلى البعض عن روح المهنية لصالح روح المشجع
-ما كنتش حابب أكتب في القصة دي لكن والله العظيم لو مكتب ممدوح حمزة أخد شغل في محور روض الفرج لكان هيقول انه محور حلو ومقرمش وبسمسم
- تميمة كاس الامم الافريقية حلوة..انتم بس اللي بتتعاملوا مع شركات بي ار ما طلعتش بمصلحة فبتطلع القطط الفطسانة
- سبب الخناقة بين شيكو وفهمي وهشام انتهي.. لو هنا الزاهد أقنعت أحمد فهمي - وهي تقدر - ان الثلاثي يرجع يشتغل مع بعض هتبقى قدمت خدمة للفن أكبر من اعتزال مي عز الدين الكوميديا
- رب ضارة نافعة.. الخلاف اللي حصل بين شيكو وفهمي وهشام وانتهي بالانفصال الفني عن افضل ثلاثي كوميدي كان سببا في منح الفرصة لأكرم فهمي وأحمد أمين وأخيرا محمد عبد الرحمن.
- بعيدا عن الضجة الكبيرة على السوشيال ميديا جمهور محمد رمضان لن يهتم بخناقة عبد الرحيم كمال والمخرج.. جمهوره ينتظر منه أن يقلب الطاولة ويطلع الشبح اللي جواهم
- اعتقد ان برنامج الاسطورة الذي يذاع في رمضان على الراديو 9090 يستحق أن يكمل مسيرته بعد انتهاء الشهر الفضيل.. نحتاج هذه النوعية من البرامج لنربي اولادنا وأنفسنا على أن هناك اساطير افضل من التى صنعتها مشاهدات اليوتيوب
- اوس اوس عامل دور كويس في هوجان وبياكل عيش في البرنسيسة بيسة وعمل ضحك السنين في كام مشهد ضيف شرف ظهر فيهم في الواد سيد الشحات
- من وقت وفاة " ماما نونا" في مسلسل " حماده عزو" لم يتآثر المشاهدين مثلما تأثروا بوفاة والد عمرو سعد في " بركة "
-ولد الغلابة.. السؤال اللي شاغل دماغي من اكتر من 10 حلقات.. ازاي عندنا ممثلة زي انجي المقدم وسبناها الفترة دي كلها.. انجي ممثلة جامدة ودورها من اكتر الأدوار صعوبة وتعقيد في المسلسل واداء الشخصيات على أعلي مستوي
- محمد عادل امام ناشر صورة له مع الممثلة الشابة هاجر احمد اللي عاملة شخصية نور وكاتب عليها: السنين اللي جاية بتاعتك بتفكريني بممثلين اوروبا.. معلوماتي ان محمد ما عملش أفلام ولا دراما مع ممثلين من اوروبا علشان هاجر تفكره بيهم.. أما بقى ان الايام اللي جاية بتاعتها فدي قصة تانية
- عاجبني أحمد عبد العزيز في مسلسل كلبش وعاجبني هشام سليم جدا.. الاتنين دول تحديدا من المفاجآت الحلوة في رمضان
- لحظة وقوف ابن سليم الانصاري في كلبش من اللحظات المبهجة في المسلسل فيه حد كان بيتفرج جنبي أخد ابنه بالحضن وهو بيتابع فرحة سليم
- ياسمين عبد العزيز لديها رصيد من الكوميديا تركته واتجهت للدراما، صحيح ان التجربة لم تحقق ربع نجاحها في الكوميديا لكن التجربة في الفن مطلوبة حتى لو كانت نتيجتها أن نشعر بغيابها عن رمضان
- انا مبسوط بعودة محمد رجب للتمثيل.. رجب ممثل كويس وبيشتغل مع مخرج كويس السنة الجاية تكون الانطلاقة للاتنين
دعاء اليوم: اللهم أنت تعلم أن هناك قلوب لم تعرف غير الكره فلا تسلطها علينا