رغدة السعيد تكتب: نفسنة

نفسنة، منفسن، نفسية.. إيه بقى أصل الكلمة دى؟ وجهة نظرى المتواضعة إنها جاية من النفس أو المريض النفسى. المريض النفسى اللى ممكن يكون حاسس إنه مضطهد مثلًا أو عنده وسواس وشايف اللى حواليه كلهم بيتمنوا له الشر وبيكرهوا نجاحه.
مفيش شخص منفسن إلا وبيشوف كل الناس بتحقد عليه ومنفسنة عليه، وده بيكون نوع من الإسقاط، إنه رافض حقيقته المنفسنة فبيسقط الصفة عنه ويرميها على كل واحد فى حياته. فيتحول الشخص ده لشخص بيعلق كل فشله على شماعة إن الناس بتحاربه وكارهة الخير ليه.
مواصفات الشخص المنفسن
- حاقد وبالتالى ممكن يتحول لحاسد لأنه كاره الخير لغيره.
- عينه دايمًا على حاجة غيره، غير قنوع ولا راضى بحاله.
- مكتئب ومحبط لأن كل نجاح بيشوفه فى حد وهو مش قادر يكون زيه بيسبب له إحباط.
- طاقته سلبية وكلها موجهة للإضرار بغيره أو التلسين عليه لأنه كاره ومعدم الثقة فى نفسه، وبالتالى بيحاول التقليل من شأن غيره يمكن يعلى هو.
- خمول وغير نشيط لأنه بيستسهل شماعة إن السبب فى الفشل هو الآخرين، فمش بيعمل مجهود إلا لو هيضر حد.
- لا يشعر أنه منفسن وبالتالى ممكن يكون موهوم إنه شخص وسيم أو إنها فتاة جميلة وإن ده سبب نفسنة الناس عليهعليها.
- القيل والقال واللوكلوك الكتير من طباعه.
- فى مجال السوشيال ميديا ممكن تلاقيه عامل شير لحاجات خير كتير لإعطاء نفسه برواز الفضيلة ودايمًا بيقوم بالنصح والإرشاد.
- صياد ماهر للأخطاء وبعد ما يصطادها وينشرها يحاول جاهدًا إثبات إنه مش عنده الأخطاء دى وإنه مثالى (نظام أنا شاطر يا ميس).
- غلّاوى ويكره نجاح الآخرين وساعات اللايك أو الشير بتكون تقيلة عليه لنجاح شخص، وهيعملها فى حالة واحدة هى المنظرة بمعرفة الشخص ده أو ادعاء إنه صديق.
- دايمًا شايف نفسه صاحب فضل ع الناس ويتقن دور المتواضع بطريقة مبالغ فيها.
- منافق ببساطة لأنه بيخفى نفسنته بضحكة أو نظرة.
- يكره المواجهة ودايمًا مش بيحب يكون فى وش المدفع، بس عنده القدرة يشحن اللى حواليه لعمل المواجهات.
- حالة إنكار للواقع وتصديق كذبه على نفسه.
- ممكن ينفسن على نفسه شخصيًا يعنى لو صباعه اتعور ممكن يقوله: «أحسن تستاهل».
تعرف منين إنك منفسن لو أنت مش شايف فى نفسك أى صفة من دول!؟
- تأمل كده فى نظرتك للناس اللى حواليك، هل بيضايقك نجاحهم وتقول مش لو كنت أنا مكانهم كنت عملت وعملت؟.
- بس Stop، دى أول خطوة فى النفسنة، مكانهم ليه مانت ليك مكان، اشتغل اجتهد، ركز وانجح فيه.
- بتشوففى شخص جميل، ناس كتير متفقين على جماله إنه مش جميل؟ حط قطرة وطهر عينيك من الحقد وجمّل نفسك بروحك الصافية اللى هتنعكس على شكلك الخارجى.
- خلّى دعوتك للناس بالخير من قلبك وبإيمان تام ونية صافية.
- راقب نفسك وشوف تصرفاتك وشوف اللى الناس شايفاه فيك.. هل هى بتبعد عنك ولا بتحب دايمًا تكون معاك وفى صحبتك؟.
- أخيرًا.. العب شوية بحروف كلمة نفسنة واعمل شوية مجهود وحولها لكلمة تنافس شريف.
- حب نفسك عشان تعرف تحب الناس.