نقاب العصافير

- وماذا عنك؟
- لا شىء
- الدنيا قايمة مش قاعدة
- هو أنا لو ليا رأى كنت لبسته م الأول
- الله!
- الله واحد
- طب إيه؟
- ولا حاجة!.. هتمنعوه من المدارس والجامعات بس مش هتمنعوه ف العقول، مش هتمنعوه م البيوت اللى بندخلها أحرار ونفضل فيها عبيد
- إنتى مثقفة وعيب تقولى كده ولازم تشيلى البتاع اللى مخليكى شوال تبن ده
- مثقفة! لأ حضرتك أنا متجوزة، وممكن أدفع حياتى عشان بتكلم مع أجنبى
- أجنبى؟! أنا عصفور يا أمانى!
- هههههه.. وأنا ما بقتش أمانى يا عصفور
- أنا اللى شلت البامبرز بتاعك وغيرته عشرين تلاتين مرة
- انسى يا ابن عمتى الغالى.. فاتك كتير عن حياتى
- للدرجة دى؟!
- واحدة اتجوزت شاب مهذب وابن ناس وعاجب العيلة كلها وسافرت معاه السعودية حيث الفلوس والهنا كله.. والهدايا للخالات والعمات.. تفتكر من حقها تشتكى من حتة خناقة على لبس النقاب؟ الراجل عايز يحافظ على لحمه يا بنتى.. حد يقدر يلومه؟! وأنا بقى اللى طلعت فاسقة وقليلة الأدب وما استحقش النعمة اللى ربنا إداهالى
- والعقل والمنطق
- أنا ليلة ما جوزى اشترى النقاب وحطهولى على كنبة الصالة كنت بعيط لماما فى التليفون وأقولها أنا اللى واخدة ماجستير أتحط فى شوال يا ماما؟ تخيل ترد وتقولى إيه!
- إيه؟!
- هو أنتى أحسن من مرات النبى يا أم ماجستير أنتى
- مش فاهم!
- عنك ما فهمت يا عم.. أومال عايزين تتكلموا عن النقاب كده وخلاص؟ اعرفوا الأول القصص والحكايات
- كل حاجة اتغيرت فيكى إلا لسانك الطويل
- كويس إن لسه فيه حاجة فاضلة يا سى عصفور.. وبعدين أنا اللى سميتك عصفور أصلًا
- ههههه آه عشان كنت بجيب لك بطاطا مشوية ودوم.. فاكرة الجميز؟
- مش عايزة أفتكر
- طب إيه؟
- ما قولت لك.. الموضوع جزء من دموعى وعجزى وانكسارى أنا وعشرات زى حالاتى
- يعنى نحمى دول إزاى؟!
- وسعوا للبنات شوية.. إدوهم فرصتهم يا جدع.. اللى تاخد ماجستير عينوها واللى تاخد دكتوراه كافؤها، بطلوا تتحرشوا بيهم وتكرَّهوهم فى الحياة والكون نفسه، حسسوهم إن الجواز مش نهاية الكون وإن البلد محتاجاهم
- يا ستى رئيس الجمهورية نفسه بيقول ده.. المشكلة فيكوا يا أمانى، البنت بتفكر فى الجواز والستر وضل راجل ولا ضل حيطة برضه!
- طفشتوهم
- ما تجمعيش.. مش كل الرجالة بالشكل القذر ده
- عموما.. امسح الشات ده وانسى إنى اتكلمت معاك يا عصفور الزمن الجميل.