الحياة مشاركة
حبيبي أنا يوم ما حبيتك واتجوزتك كان على أساس إنك راجل كامل الأهلية وقادر على تحمل مسئولية بيت فمن باب أولى أكيد أنك متحمل مسئولية نفسك؛ فليه تبقى حياتنا كلها عبارة عن: جعان حطي لي آكل، عطشان هاتيلي أشرب، عايز شاي قومي اعملي لي شاي، فين القميص؟ مش مكوي ليه؟ فين الريموت؟ فين الموبايل؟ حبيبي أنا مش متجوزة طفل أنا متجوزة راجل كبير مسئول!
حبيبي لما أنا أعملك كل ده أنت بتعمل ايه؟ متقوليش أنا بشتغل وبتعب عشان أنا كمان بشتغل وبتعب، ومتقوليش أنا بصرف على البيت، عشان عمر ما مرتبك لوحده ممكن يكفي مصاريف أي بيت في الزمن الجميل ده –إلا لو انت مليونير-، حتى لو انت رسمياً مبتاخدش مني حاجة فأكيد أنا بكمل حجات كتير في طلبات البيت من غير ما اقولك لأني حسيسية وعارفة دخلك يكفي إيه وانك أكيد ليك احتياجات شخصية بعيداً عن طلبات البيت محتاج توفرها لنفسك.
غير إني أنا كمان أكيد ليا طلبات كتير من لبس ومكياج وخروجات مريحاك من مصاريفهم بشغلي، فأكيد منطقي إن من حقي تريحني من طلباتك الأوفر اللي مفيش داعي ان حد يعملهالك أصلاً، حبيبي احنا أصلاً متجوزناش عشان أنا أطبخ لك واكويلك واكنسلك وانت تشتغل وتصرف عليا لإننا أصلاً مكناش محتاجين حاجة من دي، لو على شغل البيت فأكيد الحجات التافهة دي تقدر تعملها لنفسك ولو على إن حد يصرف عليا فأكيد أنا أقدر أشتغل وأصرف على نفسي!
حبيبي احنا اتجوزنا عشان نتشارك حياتنا مع بعض مش عشان اقف أنا طول اليوم في المطبخ وأنت طول اليوم في الشارع، عشان نرسم احلامنا ومستقبلنا مع بعض عشان نخطط لحياتنا مع بعض، عشان نتشارك عواطفنا ومشاعرنا مع بعض، عشان نقضي الوقت مع بعض، مش عشان كل واحد يطحن في حتة بعيد عن التاني، اننا نتشارك الحياة مع بعض مش معناها إني أطبخ وانت تاكل! انما معناها اننا نقف نعك مع بعض في المطبخ وناكل اللي عكيناه ده مع بعض واحنا بنضحك ومبسوطين.
المشاركة مش معناها انك تطحن في الشغل وتشتغل وظيفتين نهاري ومسائي وتقضي اليوم كله بره البيت عشان تجيب فلوس أروح أنا أشتري بيها هدوم ومكياجات براند وعربية آخر موديل ودهب اتمنظر بيهم على صحابي وقرايبي، المشاركة اننا نشتغل مع بعض ونساعد بعض في مصاريف البيت ونعيش على قدنا، ونرجع بيتنا مع بعض مبسوطين باللي بنعمله ونقضي باقي اليوم مع بعض نتكلم ونضحك ونهزر ونحب بعض زي أيام الخطوبة وشهر العسل.
المشاركة مش إني أخليك تسيب الشغل اللي انت بتحبه عشان مش بيجب لي الفلوس اللي تخليني زي فلانة وعلانة، ولا انك تخليني أسيب الشغل اللي أنا بحبه عشان معطلني عن الطبيخ والكنس والتنضيف! المشاركة اننا نشجع بعض على تحقيق أحلامنا وأهدافنا المهنية وان كل واحد فينا يبقى حاجة مهمة في مجاله وكل واحد فينا يفرح للتاني بنجاحه ويساعده عليه مش يغير منه.
الجواز مشاركة مش استنزاف، الجواز اننا نكمل بعض مش نكسر بعض، الجواز مش مسابقة مين هيسيطر على التاني أكتر ويلغي وجوده لصالحه، الحياة واسعة وتساعنا احنا الاتنين، الحياة مش يا أنا يا أنت الحياة أنا وأنت ماسكين ايد بعض عشان نعديها!
