علاقة مشروعة

# "علاقة مشروعة" من المسلسلات الحلوة بجد في رمضان قصته وعلاقات شخصياته ببعضهم البعض صنعت أحداثًا شيقة. 
# ياسر جلال في مسلسل "علاقة مشروعة" يعود إلى الأعمال الاجتماعية بعد سلسلة أعمال أكشن وضعته في خانة الأستاذ أحمد السقا، ياسر تخلص من الأكشن ودخل في خانة الأستاذ طارق لطفي عقبال ما يتخلص م الدقن.

# علاقة مشروعة مغامرة تحسب لصناع العمل بداية من الرهان على "ياسر جلال"، ثم الرهان على القصة المعقدة وتفاصيلها المتشابكة والمشاركين فيه ونهاية بالأحداث التى تم تكثيفها في ١٥ حلقة.

# أنا متعاطف مع داليا مصطفي في المسلسل.

# "زوجة مراد مكرم  في المسلسل ضحكت عليه وفهمته أنها هترجع له وخدت منه الفيلا والعربية، وصاحبتها اترمت عليه على أساس أنه يطلع خاين وكده، وصاحبه ضحك عليه وفهمه أنه هيرجعه لمي عمر، رغم أنه متجوزها أساسا..هو ما فيش حد يطلع عينه في المسلسل غيره؟.

# السؤال اللي مش لاقي له إجابة حتى الآن ليه دايما مراد مكرم في المسلسلات مراته بتخونه، أعتقد أنه لو مهتم بيهم زي ما هو مهتم بريفيوهات المطاعم والأكل ما كانتش واحدة فيهم خانته، بالمناسبة المرة الوحيدة اللي خان فيها مراته في مسلسل كانت في "نصيبى وقسمتك 3" وقتها كان متجوز ميرهان حسين وده سبب كافي لكل اللي بيحصل له من بعدها في المسلسلات.. حد يتجوز ميرهان ويخونها.

# مى عمر اتهمت سائق ياسر جلال بأنه سرق ساعة ألماظ، فياسر جلال زعل منه جامد وقرر يطرده من الشغل وقاله الساعة اللي أخدتها دي مكافأة نهاية الخدمة.

# الدرس المستفاد من علاقة مشروعة أنك تاخد بالك لما واحدة ست تقولك "سرك في بير"، مي عمر وعدت ياسر جلال إن جوازهم هيفضل سر، تاني يوم كانت بتحكي لصاحبتها، والسواق شافهم وعرف وأخوها اتطقس وعرف حتى ابن ياسر جلال شافهم وعرف وهيضرب مخدرات بسببه، فلما حضرتك تسمع جملة "سرك في بير" من واحدة تأكد أنك هتلبس.

# تاني شيء بيعجبني في مسلسل "علاقة مشروعة" بعد تماسك القصة رغم التفاصيل الكثيرة وتشابك العلاقات والأحداث، هي قفلة كل حلقة، دائما ما تكون قوية وتشدك للحلقة التالية وهو جهد مشكور من المؤلفة سماح الحريري والمخرج المميز خالد مرعي.

# الحوار اللي دار بين داليا مصطفي " الزوجة الأولي" ومي عمر "الزوجة الثانية"، والتى تحدثت فيه مي عن أكتر شيء بيعجبها هو أنه بالرغم من وجود العيال ومامتها إلا أنها برضو مركزه مع عمرو "ياسر جلال"، فردت عليها بمنتهي الثقة أنها بتعرف كل حاجة عنه بما فيها الاجتماعات بتاعته.. للأسف يا داليا كان  فيه اجتماعات أهم  مخبيها عليكي.

# ابن ياسر جلال لما اكتشف علاقة والده بمي عمر شرب  بيره على أساس أنه ينسي اللي حصل.. ولأن خبرته في الحياة على قدها، فالبيرة اللي شربها مش هتعمل حاجة، لأنها   مدرة للبول يعني لا هينسي أحزانه ولا بتاع دي بالكتير هتخليه يعمل بي بي.

# علاقة مشروعة مسلسل بيقولك خلي بالك وما توزعش ثقة بدون حساب.. علشان هتزعل.