«أخلاقنا الجميلة».. «العيش والملح مش مع الناس بس مع البلد كمان»
أطلقت الشركة المتحدة للخدمات الإعلامية عبر قنواتها المختلفة حملة "أخلاقنا الجميلة" وتهدف للتحلي بالأخلاق الحميدة والبُعد عن الصفات الدخيلة مثل "التنمر، التحرش، سوء معاملة الكبير، وغيرها".
واستعانت حملة "أخلاقنا الجميلة" بمقطع صوتي للفنان الراحل فؤاد المهندس، حيث قال "في تعبير قديم ماشي بيننا وبين بعض وبنقوله من غير ما نحاول نفهم معناه على حقيقته في حين إننا لو فكرنا فيه شوية ووصلنا لمغزاه هنحترمه ونقدره أكثر".
وتابع "التعبير ده بيقول بيني وبين فلان عيش وملح والمعنى الظاهري من الكلمة إن في بين الاثنين صداقة وحب لكن المعنى الخفي للكلمة أكبر من كدة بكثير، مضيفا الواحد لما تضيق به الأحوال ويبقى على الحديدة ويمكن بيفكر يبيعها كمان بيبقى مفيش قدامه حاجة يأكلها غير العيش اللي يغمسه بملح".
- قيمة العيش والملح هى المشاركة فى الأزمات
واستكمل: "لما واحد صاحبك يجيلك برجله وباختياره علشان ياكل معاك العيش والملح ده ويشاركك أزمتك ويحاول يخفف عنك الظروف لحد ما تنتهي ومن هنا قيمة العيش والملح اللي هي المشاركة في الأزمات، المعونة اللي الواحد يقدمها لصاحبه وده اللي لازم يكون، لازم نقدر النعمة اللي بناكلها مع أصحابنا وحبايبنا وقرايبنا مش بالكلام بس لا وبالعمل، بالمحاولة على إنهاء الأزمة".
واختتم: "الكلام ده مش للأصحاب بس أبدًا في أهم من الأصدقاء والأهل كمان، البلد بلدنا اللي لازم نحتملها في أي أزمة تمر بها مش نديها وشنا ساعة غناها وبعدين نديها ظهرنا ساعة أزمتها، لا بالعكس لازم نرد لها الجميل لازم نحاول بكل طاقتنا إننا نقف يد واحد في أي أزمة علشان نعدي بها لبر السلامة ونعمل بحق لقمة العيش اللي بيننا وبين البلد اللي شالتنا في طفولتنا وهتشيل أولادنا".
